CEBU, Philippines — Malampuson ang kapolisan sa ilang feeding ug gift-giving program sa 60 ka batang kabus sa Zapatera, Dakbayan sa Sugbo kagahapon.
Ang kapolisan sa Parian Police Station nga gipangulohan sa bag-ong hepe nga si Senior Insp. Narrolf Tan ang nagpasiugda sa programa.
Ilang tema mao ang “Protektahan ang mga bata, sila ang atong ugma”.
Giawhag ni Tan ang mga ginikanan nga nitambong nga dili pasagdaan ang mga bata aron dili matintal sa ilegal nga drugas.
Samtang kapin sa 5,000 ka bata gipaabot nga makapahimulos sa Kiddie Land sa mini-Hoopsdome sa Talima, Isla sa Olango, Dakbayan sa Lapu-Lapu.
Libre ang pagsakay ug makapabusdik nga lamiang pagkaon ang ihatag sa kagamhanan sa dakbayan.
Kini maoy kabahin sa paghatag og katagbawan sa mga kabus nga kabataan sa Isla sa Olango sa pagsuroy sa 150 ka Santa Claus nga sakay sa biseklita nga magdala og mga regalo.
“Ato ning gidala dinhi sa isla kay dili man tanan mga bata dinhi sa isla naka-experience ani sa una. Maayo pud na nga makatilaw sab sila aning mga kalingawan nga wala pa sila kasulay,” matud ni Mayor Paz Radaza. (BANAT NEWS)