2 tipi, 100 angol sa linog
Giingong aduna lamang kini gilawmon nga 2-kilometro sa ilawom sa maong dapit. Ang pagtay-og nabatyagan og Intensity 5 sa Tacloban City, Palo, Leyte, ug nabatyagan usab kini hangtud sa Cebu City. AP
CEBU, Philippines - Gitay-og og magnitude 6.5 earthquake ang Leyte kagahapon alas 4:03 sa hapon sumala pa sa PHIVOLCS nga nabatyagan walo ka kilometro habagatang-kasadpan sa lungsod sa Jaro, giingong duha na ang patay sa hitabo.
Giingong aduna lamang kini gilawmon nga 2-kilometro sa ilawom sa maong dapit. Ang pagtay-og nabatyagan og Intensity 5 sa Tacloban City, Palo, Leyte, ug nabatyagan usab kini hangtud sa Cebu City.
Matud pa ni PHIVOLCS Deputy Director Bartolome Bautista sa report sa GMA News.TV, ang maong linog resulta sa paglihok sa Leyte segment nga sumpay sa Philippine fault.
Sumala pa sa interbyu sa dzBB kang Kananga, Leyte, Mayor Rowena Codilla nga padayon pa silang nagpaabot sa mga rescuers gikan sa provincial government nga motabang sa ilang mga lokal nga rescuers kay kuwang sila og gamit.
Matud pa niya sa maong interbyu adunay usa ka lalaki nga nakalas, usa ka babaye ang naangol, apan wala pa siyay kompletong impormasyon bahin sa eksaktong gidaghanon sa ubang casualties.
Dugang pa niya, nga adunay nahagsa nga commercial building nga dunay grocery, hardware ug boutique.
Sa interbyu kagabii sa ANC kang Ormoc City Mayor Richard Gomez mibutyag kini nga miabot na og 100 ang naangol.
Sa sayo pa, sa interbyu sa GMA News.Tv, ang mayor miingon nga adunay usa nga nakalas sa bukirong barangay sa ilang dapit.
Ang nangaangol apan minor injuries lamang ug ang uban na-trauma sa hitabo. Nipasidaan ang PHIVOLCS posible gyung adunay masinating aftershocks apan way tsunami nga mahitabo kay sa kayutaan man kini nahitabo.
Nakasinati usab og brownout sa Dakbayan sa Sugbo human sa linog. Matud pa sa tigpamaba sa Visayan Electric Company, Quennie Sanchez Bronce, ang maong linog maoy hinungdan niini.
Matud niya naapektahan ang ilang power generators maoy hinungdan nga adunay nasinati nga interruptions sa mga VECO franchise.
Ang VECO mipasidaan nga kung dili mo-stabilize ang power supply posible mopahigayon sila og rotational brownouts. Base sa uwahing pahibalo sa National Grid Corporation of the Philippines (NGCP), naapektahan usab ang power interruption sa tibuok Bohol kagahapon.
Matud pa sa NGCP, nag-trip off ang 138kV Ormoc-Maasin lines tungod sa maong linog.
Tungod sa maong linog, daghang mga tinun-an sa Cebu City ang namauli human sila nanggawas sa ilang mga tunghaan.
Matud pa ni Nagiel Bañacia sa Cebu City Disaster Risk Reduction Management Office walay natala nga mga kadaut ug angol.
Sa Dakbayan sa Mandaue gikataho nga adunay tulo ka mga tinun-an ang nakuyapan sa inila nga tulonghaan apan sa pagsubay sa Banat News sa Police Station 5 sa Mandaue usa lang ang ilang nadawat nga taho nga adunay nakuyapan tungod sa kalisang matud ni Police Officer 2 Juanito Libres.
Samtang sa Jaro, Leyte nga maoy epecinter sa linog wala silay natala nga kadaut matud pa ni Senior Police Officer 4 Cyril Chu.
Sa Kananga,Leyte, si Police Officer 3 Rolando Lago mibutyag nga padayon karon ang rescue operation sa pagpangita sa mga tawong posible nga nadat-ogan. Rowena D. Capistrano ug report gikan sa Wires (BANAT NEWS)
- Latest
