Anak gihimong drug runner
Jojo Ugdol, Gabriel Bonjoc (Banat) - March 27, 2017 - 12:00am

CEBU, Philippines - Nasikop sa kapulisan sa Siyudad sa Talisay ang giingong bata-bata sa napatay nga inilang drug lord nga si Jeffrey Diaz alyas Jaguar didto sa parkingan sa usa ka dakong mall sa Brgy. Tabunok, Dakbayan sa Talisay niadtong Sabado sa gabii.

Apan lahi ang estilo sa dinakpan tungod kay ang iyang anak nga lalaki nga menor de edad maoy iyang gipabitbit ug gipatunol sa ginadiling drugas ngadto sa iyang gikasabot nga adtong tungora poseur buyer diay sa polis.

Ang suspek giila nga si Edlyn Generales, 37, taga Spolarium St., Brgy. Duljo-Fatima, sa Siyudad sa Sugbu. Si PO2 Romanito Dinapo sa Talisay City Police Station nagkanayon pirmeng molutaw ang pangan sa dinakpan matag aduna sila’y madakpang durugista.

Apan idlas kaayo si Generales ug dili kini basta lang mosanong sa mga transaksyon kun dili niya kaila ang mopalit.

Tungod niini, gigamit sa kapolisan ilang dinakpan nga kustomer pud ni Generales ug misugot kining adto magkita sa usa ka mall sa Tabunok ug didto kini nadakpan.

Matud niya ang gipabitbit sa suspek sa gi-order nga drugas ang iyang anak nga edad 11-anyos.  Gawas sa drugas nga natunol sa bata nakuhaan pa kini og laing dagko nga putos diha sa bulsa nga tanan mitimbang og 50 gramos nga mobalor og P590 mil. Ang maong ginang walo ka buwan nga mabdos ug adunay lima ka anak.

Ang iyang anak  gi-turn-over ngadto sa Department of Social Welfare and Development (DSWD).

Sa pakisusi sa kapolisan, gikatahong bata-bata si Generales ni Diaz nga wa gihapon mohunong sa maong ilegal nga negosyo.

Samtang kapin tunga sa milyon ka pesos nga shabu ang nasakmit sa kapulisan sa siyudad ug probinsya sa Sugbo sa managlahing  operasyon.

Sa Dakbayan sa Sugbo, kapin sa P300 mil nga gituohang shabu ang nasakmit sa Cebu City Police Office gikan sa 27-anyos nga si Ford Fantonial human sa buy-bust operation diha sa Sitio Wangyu, Brgy. Mambaling.

Nakuha gikan niya ang usa ka dako nga putos, usa medium size ug 76 ka gagmay nga paketeng gituohang shabu nga mokantidad og P358, 720.

Samtang sa lungsod sa Moalboal, nag-uban sa prisohan ang maglive-in partners nga sila si Rene Gaballo, 29, ug Beberle Paculaba, 42, human sila nasikop sa buy-bust operation diha sa Sitio Pook, Brgy. Poblacion West.Nakuhaan sila’g shabu nga mikantidad og P292,640. - Rowena Capistrano ug Romeo T. Limpangog/EIM) (BANAT NEWS)

JEFFREY DIAZ
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with