Mga sugarol gipangsikop

CEBU, Philippines - Sukad gikuhaan sa ilang gahum sa pagpanakop sa  mga tawo nga nalambigit sa ginadiling drugas, gitutukan na sab karon sa kapolisan ang ilegal nga sugal.

Sa Dakbayan sa Mandaue, pito ang nasikop sa managlahing anti-illegal gambling operation nga gihimo sa Mandaue City Police Office.

Sa Sitio Tribunal sa Brgy Centro, nadakpan ang upat ka tawo nga nagpasiugda og hantak. Giila ni PO2 Jayson Flores sa Presinto 1 ang nadakpan nga sila si Jovel Fernandez, Rengie Pareja, Ervin Rosales ug Roland Dentrampas. Nasakmit nga ebidensiya mao ang tipik sa gipusta nga salapi nga nahakop sa mga sugarol dihang sila nanagan nga nagkantidad og P53.

Dugang nakuha mao ang tulo ka sinsiyo nga piso nga gihimong antugon ug ang lingin nga bato nga gihimong antuganan.

Samtang sa Purok Mango sa Brgy. Umapad, nadakpan  pasado alas 6 sa miaging gabii ang tulo ka lalaki nga nagdula og tong-its.

Si PO3 Rey Patigdas sa Presinto 5 miila sa mga nadakpan nga sila si Rodel Raso, Genaro Ruelan, ug Brias Tga. Nasakmit gikan kanila ang gigamit nilang baraha ug P30 nga pusta.

Sa Dakbayan sa Talisay, duha ka babaye nga nalambigit sa ilegal suwertres ang nasikop human gironda sa mga sakop sa Talisay City Police Station ang New Frontier Homes sa Brgy Bulacao niadtong miaging adlaw.

Ang mga dinakpan mao sila si Mischelle Bacus, lumad nga taga Luay, Toledo City ug si Kim Arlante, lumad nga taga Can-ayoan, Malaybalay City, Bukidnon.

Ang mga otoridad pinanguluhan ni SPO3 Vicente Taladua, nakadawat og impormasyon labot sa ilegal nga kalihukan sa duha hinungdan nga dali nila kining gihimuan og operasyon.

Nakuhaan og mga gamit sa ilegal nga swertres ug kwarta nga mokantidad og P400 ang mga dinakpan.

Duha sab ka illegal gambling machines ang nasakmit sa kapolisan sa Sitio Candaya sa Brgy Mohon diin daghang menor de edad ang giingong manuwa sa maong ilegal nga makina hinungdan nga gireport kini sa mga ginikanan.

Ilang nakuha ang video karera ug moli-moli machines apan walay mga nanuwa nga nasikop.

Sa merkado publiko sa Brgy Cansaga sa Lungsod sa Consolacion nasikop ang usa ka Jeffrey Garcia nga taga Ibabao Estancia, Dakbayan sa Mandaue human naaktuhan sa kapolisan nga nangisyo og illegal suwertres ngadto sa posuer buyer.

Nasakmit gikan niini ang P85 nga halin ug mga stub nga gisulatan og nagkadaiyang kombinasyon nga numero nga naglakip sa 666 ug 111. Ang mga dinakpan temporaryong gitanggong sa detention cells ug pasakaan og kaso base sa kalapasan sa Anti-Gambling Law nga gihugtan karon sa kapolisan. (BANAT NEWS)