12 ka magsuong bata giabandonar
CEBU, Philippines - Nakigtinabangay ang Provincial Council for Women and Children sa Municipal Social Welfare Office sa Lungsod sa Cordova sa pagpangita sa mga ginikanan nga niabandonar sa ilang 12 ka anak.
Si Bise Gobernador Agnes Magpale, co-chairperson sa PCWC, nibutyag nga sa nilabay’ng semana nagpahigayon sila og medical mission sa lungsod diin dunay usa ka bata ang nahagbong hinungdan nga gipadala nila sa Vicente Sotto Memorial Medical Center ug gitahi ang ulo nga nasamad.
Ang maong 10-anyos nga bata nasayran nga dunay sakit nga pneumonia hinungdan nga gipatambalan na lang usab kini sa PCWC ug giatiman ang paggawas niini sa tambalanan. Ang nagbantay sa tambalanan sa maong bata mao ang 13-anyos nga maguwang.
Matud ni Magpale nga nasayran nila nga 12 diay ka managsuon ang maong mga bata ug ang kamanghuran nagpanuigon pa og duha ka tuig.
Giingong ang inahan sa maong mga bata tua sa Manila samtang ang amahan giingong wala sab makaatiman kanila. Si Magpale nimando sa iyang staff nga ibutang una sa social welfare sa Cordova ang bata human makagawas sa tambalanan aron dili maglibud-suroy og balik sa karsada aron magpakilimos o mangayo og pagkaon. Giingong ang ubang igsuon sa nahisgutang bata gipasagop na kini apan gikatakdang susihon usab kini sa PCWC pagseguro nga ang bata nga gipasagop gihatagan kini og maayong pag-atiman og paeskwelahon.
Ang PCWC gikatakdang makigtagbo sa social welfare sa Cordova kabahin sa sitwasyon sa maong mga bata samtang ang amahan sa maong mga bata gipangita sab kini karon.
- Latest