Lahugay sa PRO-7 gipatuman
CEBU, Philippines - Usa ka semana sa paglingkod sa bag-ong Regional Director sa Police Regional Office 7, Chief Superintendent Noli Taliño, gilahugay niini ang pwesto sa lima ka division chiefs sa rehiyon.
Ang naapektohan sa lahugay mao sila si Superintendent Julian Entoma nga mao nay hepe sa Regional Intelligence Division nga kanhi nadestino sa Regional Operations and Plans Division.
Si Senior Superintendent Marciano Batiancela Jr., nga gikan sa Regional Headquarters and Services Group mao na ang hepe sa Regional Operations and Plans Division. Samatang ang kanhi hepe sa RID nga si Supt. Rex Derilo mao na ang hepe sa Regional Logistics and Research Development Division.
Si Supt. Alet Virtucio mao nay molingkod isip hepe sa Regional Police Community Relations Division. Si Alet gikan sa Regional Logistics and Research Development Division.
Ug ang kataposan mao si Senior Supt. Clarito Baja, ang gipulihan ni Virtucio mao na ang hepe sa Regional Headquarters and Services Group.
Wala maapektohi ang buhatan ni Senior Superintendent Renato Dugan sa Regional Personnel and Human Resources Development Division, Senior Superintendent Leo Francisco sa Regional Comptroller Division ug ni Supt Henry Biñas sa Regional Investigation and Detective Management Division.
Sumala pa ni Senior Superintendent Rey Lyndon Lawas, deputy regional director for operations, nga ang revamp gituyo aron nga malibot sa tanang hepe sa divisions ang trabaho sa nagkalain-lain nga buhatan sa kapolisan.
Dugang ni Lawas nga makatabang kini sa mga opisyal nga makahibalo sa trabaho samtang pasaka pa lang sila sa ilang ranggo.
Anhi usab unya masuta kun kinsang mga opisyala ang maayong mobuhat sa ilang trabaho bisan pa man og bisan asa sila ibutang dugang ni Lawas. (BANAT NEWS)
- Latest
