Kagawad gidakop sa GSO
Ni Bryner L. Diaz (Banat) - June 12, 2016 - 12:00am

CEBU, Philippines - Gidakop sa mga sakop sa General Services Office si Brgy. Kagawad Rudy Tabasa sa Labangon ning Dakbayan sa Sugbo human kini nagmakuli sa pag-uli sa Toyota Hi-Lux nga sakyanan alas 8 niadtong Biyernes sa gabii.

Natanggong og pipila ka oras si Tabasa sa buhatan sa City Intelligence Branch sa Cebu City Police Office human nga didto siya gihandos sa taga GSO nga midakop kaniya. Sumala pa ni Senior Inspector Jovito Labra, deputy chief sa CIB nga nahinabi sa mga tigbalita nga igo lang gikuyogan sa mga operatiba sa CIB ang taga GSO tungod kay mi-request sila og police assistance.

Dugang pa ni Labra nga walay kalibotan ang CIB nga mao kadto ang tuyo sa GSO ug igo ra pud sila nidawat sa pagkostudiya ni Tabasa tungod kay gidakop na man kini sa taga GSO.

Si Tabasa nga nahinabi sa mga tigbalita miingon nga ang taga GSO ug ang mga taga CIB miadto sa iyang balay ug iya kining giingnan nga pwede ra nila estoryahon ang tanan.

Sumala pa niya iya pang giingnan ang taga GSO nga gabii na man ug wala nay opisina pwede man niya iuli ang sakyanan sa Lunes na ug gani iya pang gi-agni sila sa pagkuyog sa parking area diin didto niya gibutang ang sakyanan.

Apan matud pa niya nga giingnan lang siya nga pakuyogon sa mga taga GSO ug didto na siya gidala sa buhatan sa CIB. Gi-blotter sa CIB ang hitabo ug ang rason mao nga base sa taga GSO nakalapas si Tabasa sa Article 221 sa Revised Penal Code tungod sa wala niya pag-uli sa sakyanan bisan pa sa memorandum nga giisyu ni Acting Mayor Margot Osmeña nga ipauli na kini sa city hall aron sa pag-inventory.

Sumala pa niya nga wala siyay nadawat nga memorandum ug andam sila sa pag-uli sa maong sakyanan.

Tungod sa iyang pagkadetiner sa CIB ang mga abogado niya pinangulohan ni Atty. Ernesto Rama nga gikuyogan sab ni City Councilor-elect Joey Daluz nidangop dayon sa korte aron mabuhian si Tabasa. Nakakuha sila og release order gikan ni Acting Vice-Executive Judge Pamela Baring-Uy, sa MTCC sa Dakbayan sa Sugbo human nga gitugotan ang ilang petition for bail and/or recognizance kagahapon sa ala una sa hapon.

Human nga makuha nila ang order dali nga miadto sa buhatan sa CIB ang mga abogado ni Tabasa ug ilang gipresentar kauban ni Daluz ang maong release order ngadto sa kapolisan.

Apan milanat gyud og duha ka oras kapin pa ang ilang pagpaabot human nga nadelatar si Atty. Eleodoro Diaz sa City Legal Office sa pag-abot sa buhatan sa CIB aron sa pagpirma ug pagsaksi sa release order sa natanggong nga konsehal.

Human nga siya gibuhian sa CIB si Tabasa nagtoo nga pamolitika ang gibuhat kaniya ug hisgotan lang usa nila sa iyang mga abogado ang tukmang lakang nga ilang himoon.

Si Atty. Rama miingon nga ila pang sabotan sa iyang mga kauban nga abogado kun unsang kasoha ang ilang ipasaka batok sa taga GSO ug sa midakop kang Tabasa.

Apan si Atty. Diaz miingon nga pwede ra ang warrantless arrest kang Tabasa ug ang ubang wala pa mouli sa sakyanan tungod kay padayon silang naglapas sa balaod labi na sa Art 221 sa Revised Penal Code.

Mosupak unta siya sa pag-release ni Tabasa apan matud pa niya nga wala silay mahimo kay gi-release na kini sa CIB.

Hinuon matud pa niya nga plano nila karon nga mosang-at og motion for reconsideration sa order ni Judge Uy. (BANAT NEWS)

 

 

RONALD “BATO” DELA ROSA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with