Polis gipatay sa tigbakayan

CEBU, Philippines - Usa ka polis sa dakbayan sa Lapu-Lapu gipusil patay didto sa tigbakayan sa Barangay Calawisan kagahapon sa udto, samtang ang iyang kauban nasamdan usab sa bitiis.

Si PO3 Antonio Inihao Jr., taga Barangay Babag, Lapu-Lapu ug intelligence officer sa Marigondon Police Station patay na pag-abot sa ospital.

Ang kauban ni PO3 Inihao nga nakaangkon og pinusilan sa iyang bitiis mao si PO3 Jasper Nuñez, 45 anyos, taga Cordova, Cebu ug nadestino sa Gun-ob Police Station 3.

Base sa imbestigasyon nga ang duha ka polis miadto sa tigbakayan kay duna sila'y gipanid-an nga personalidad nga nalambigit sa negosyo sa gidiling drugas.

Ang duha ka polis nanglingkod lang duol sa tigbakayan diha nga usa ka lalaki nga nagsul-ob og itom nga jacket, kawo ug nagkarsones maong, kalit lang mipusil ni PO3 Inihao.

Lima ka samad pinusilan ang naangkon sa polis ug ang ubang bala didto miigo sa bitiis ni PO3 Nuñez. Ang mga suspetsado abtik kaayong nangikyas human nila mapusili si PO3 Inihao nga giingong aktibo kaayo sa paghimo’g kampanya batok sa mga tigpayuhot og drugas.

Ang mga miresponde nga polis nakakuha og walo ka kabhang ug tulo ka deformed slug sa bala nga gituohang 45 caliber pistol.

Matud pa nga si PO3 Inihao nagpatabang sa iyang kumpare nga polis sa pagpaniid sa maong dapit.

Nakaestorya na sa mga imbestigador si PO3 Nunez apan dili pa siya makahatag og mga description sa tawo nga mipusil sa iyang kumpare nga polis.

Si Senior Inspector Alcon Escosura, hepe sa Marigondon Police Station, miingon nga si PO3 Inihao aktibo gyud kaayo sa kampanya batok sa gidiling drugas ug gani nakadawat kini og death threat sa Disyembre 29.

Matud ni Escosura nga nananghid kaniya si Inihao nga mohimo og surveillance sa mga tawo nga anaa sa watch-list sa ilang istasyon.

Nasayran sab nga si PO3 Inihao pirmi unta magsul-ob og bullet-proof vest wala kini nakasul-ob og bullet-proof vest kagahapon. (BANAT NEWS)