CEBU, Philippines – Gihulga sa wala mailhing tawo ang pipila ka kapitan sa bukirang barangay sa Dakbayan sa Sugbo nga kaalyado sa Team Rama pinaagi sa text messages.
Si Cambinocot Kapitan Reynald Lauron nagkanayon nga niadtong Domingo sa buntag nakadawat siya og tawag gikan sa usa ka tawo nga siya buot ipapatay.
Matud ni Lauron nga nitug-an ang iyang kaestorya sa telepono wala nahinayon ang pagpapatay kaniya tungod kay wala nagkauyon sa presyo ang nagsugo.
Nangayo og refund sa plete ang kaestorya ni Lauron aron makauli pagbalik sa Ozamis.
Apan matud ni acting Mayor Edgardo Labella nga dili kini angayan ikahadlok tungod kay sagad sa nakadawat sa text ug tawag mao ang mga kapitan sa bukirang barangay sa south ug north districts.
Tug-an ni Labella nga adunay usa ka kapitan sa bukid ang na-trauma ug mahadlok na mogawas sa ila’ng barangay.
Gimanduan ni Labella sila Cebu City Police Office Director Marciano Batiancela ug Konsehal Dave Tumulak sa pagsubay sa mga numero sa nitawag sa mga kapitan.
Matud ni Batiancela nga ila susihon ang mga hulga ug pagpangilkil sa kapitan.
Gitug-an ni Labella nga niadtong nilabay usab nga tulo ka buwan nakadawat siya og hulga apan wala kini niya tubayi tungod kay normal lang kini sa mga tawo nga naglingkod ug adunay posisyon sa gobiyerno.
Samtang ang pangulo sa Association of Barangay Councils, Kapitan Philip Zafra, niawhag sa mga kapitan nga dili magpadala sa pagpanghadlok.
Duda ni Zafra nga ang pagpanghulga aron kini pagpugong sa panerbisyo.
Tug-an ni Zafra nga sagad sa nakadawat mao ang mga kapitan sa bukid nga adunay maayong performance sa pagdumala sa ilang barangay.
Ang nakadawat sa text ug tawag mao ang kapitan sa Barangay Buot, Bonbon, Cambinocot, Malubog, Paril, Lusaran, Mabini, To-ong, Sudlon II, Budlaan, Guba ug Tabunan. – /GMR) (BANAT NEWS)