UP – Cebu mokiha sa City Government
UP – Cebu mokiha sa City Government
(Banat) - January 4, 2016 - 9:00am

CEBU, Philippines – Gitun-an sa kadagkoan sa University of the Philippines –Cebu College ang pagpasaka og kasong administratiba ug kriminal batok sa Cebu City Government tungod sa isyu sa luna diha sa Sitio Avocado, Brgy. Lahug ning dakbayan nga matud pa ilaha.

Matud ni Dean Liza Corro gitun-an karon sa ilang mga abogado ang mga kaso nga ilang ipasaka human nga gipanangtang sa mga sakop sa siyudad ang gipamutang nilang mga tents nga butangan unta sa ilang mga gamitonon sa pagtukod sa extension sa UP-Senior High School, ug ang pagtugot sa siyudad nga patukoron pagbalik sa ilang mga balay ang mga nasunogan diha sa luna sa UP.

Gipasabot usab ni Corro nga ang mandato kanila mao ang paghatag og barato o libre nga edukasyon ug dili ang paghatag og luna aron puy-an sa mga tawo.

K to 12

Giklaro usab ni Corro nga dili nila buot makuha-an og kapuy-an ang katawhan apan dugay na usab sila nangandoy nga maangkon ang maong luna aron makatukod og dugang building alang sa bag-o nga curriculum nga K-12. Matud ni Corro, adunay Memorandum of Agreement ang UP ug ang Probinsya sa Sugbo sa maong luna, ang 2,000 square meters ra niini maoy ilang gamiton sa UP, ang luna nga nasunog adunay gilapdon nga 4,000 square meters.

Samtang aduna nay giandam nga kabalhinan didto sa Sitio Nivel Hills sa Brgy.Busay alang sa mga nasunogan nga di na makabalik sa maong dapit.

Giklaro usab ni Corro nga bakak ang gipalakaw nga estorya kalabot sa land swap deal sa luna sa kagamhanan sa Sugbo didto sa SRP ngadto sa UP.

“We cannot transfer the ownership under UP Cebu,”matud ni Corro tungod kay way otorisasyon niini ang eskuylahan pagbaligya o pag-ilis og luna ngadto sa ubang ahensya.

Ang luna sa SRP nga gitukuran sa UP gidonar kaniadtong 2009 panahon pa sa administrasyon ni kanhi mayor Tomas Osmeña.

Hinuon si acting Cebu City Mayor Edgardo Labella mipadayag nga andam nilang atubangon ang kiha sa UP kalabot sa maong luna. Daan nang polisiya sa siyudad nga di angay himuong rason ang sunog aron papahawaon ang mga illegal settlers.

Wa bawia

Si Gobernador Hilario Davide, III mihimakak nga gibawi sa probinsiya ang lote nga gidonar niini sa UP-Cebu, ug giklaro niini nga ang titulo sa luna ubos na sa ngalan sa maong eskuylahan.

Apan ang kabahin sa development sa luna hisgutan pa kini tali sa UP ug probinsiya.

Ang probinsiya nagpadala og mga representante nga makig-istorya sa mga opisyal sa UP kabahin sa development sa lote.

Gibutyag ni Davide nga dunay plano kaniadto nga ang lote tukuran kini og condominium units nga socialize housing.

Matud usab sa gobernador nga hangpon nila kung ang Dakbayan sa Sugbo motabang sa pag-develop sa relocation site didto sa Brgy. Busay nga balhinan sa mga informal settlers nga gustong mobalhin.

May pabor-pabor?

Samtang gihimakak usab sa mga opisyal sa Brgy. Lahug nga adunay pabor-pabor ang paghatag og ayuda nga housing materials ngadto sa mga nasunogan.

Matud ni acting Brgy. Lahug Captain Hazel Muaña gitigom na nila ang mga nasunogan ug gipahibalo kabahin sa mga pamaagi ug proseso sa paghatag niini ug lakip na kun si kinsa kadtong makadawat ug kun pilay madawat.

Apan nasayran nga adunay mga nangreklamo kay matud pa wala sila makadawat samtang ang uban gihatagan.

Matud pa ni Muaña nga nakapalibog usab sa mga tawo ang kalabot sa reblocking nga gipatuman diha sa lugar aron mabutangan og karsada.

Si Eliseo Delfin Jr. pangulo sa Barangay Lahug Homeowner Association miingon nga dili tanang mga biktima ang gihatagan.

Base sa talaan sa barangay 17 lang ka mga home owners nga ang balay naugdaw gyud ug tulo ka partially burned ang nakadawat sa ayuda gikan sa barangay.

Nagkanayon si Muaña nga dili na sila mohatag pa og mga ayuda kay nahuman na ang adlaw sa pagpanghatag niini  kay ilaha na kining giuli ngadto sa suppliers.

Ang kagamhanan sa Sugbo adunay gipanghatag nga mga housing materials ug tag P10 mil nga ayuda alang sa mga biktima sa sunog.

Bantay kalinaw ra

Samtang giklaro sa kapolisan nga pagpatuman sa kahapsay ug kalinaw lamang ang papel sa kapolisan sa pagpadala niini og mga sakop diha sa nasunogan.

Matud pa ni Sr. Supt. Rey Lyndon Lawas ang hepe sa directorial staff sa Police Regional Office-7 nga nahinabi sa mga tigbalita, walay gidapigan ang kapulisan sa maong isyu. Sumala pa ni Lawas nga ang pag-abot sa mga pulis sa maong dapit agi og pagsanong sa mando sa hepe sa PRO-7, Chief Supt. Manuel Gaerlan nga respetahan ang katungod sa tanan ug pugngan kun adunay kagubot.

Gipasabot ni Lawas nga mihangyo kanila ang UP ug ang Cebu City pagbutang og polis sa lugar.

“Among hangyo both parties nga they will resort into something peaceful, no more no less”, matud pa ni Lawas. – Jojo C. Ugdol ug Rowena Capistrano/EIM) (BANAT NEWS)

ANG ATILDE BRGY CORRO LAWAS LUNA MATUD MGA NGA STRONG SUGBO
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with