P61B pa ang di na madawat

CEBU, Philippines - Sugod karong adlawa dili na madawat ang karaang papel nga kwarta nga gitawag og “new design series.”

Kini ang gipahinumdum sa Bangko Sentral ng Pilipinas ngadto sa publiko nunot sa pagsugod na sa tuig 2016.

Ang dawaton mao na kadto’ng “new generation currency” apan hinuon mao na karon ang gigamit sa kadaghanan.

Si Leonides Sumbi, BSP Cebu acting director, nipasabot nga bisan dili na dawaton ang karaang kwarta apan mahimo kini’ng pailisan sa mga banko ug pwede sab mismo sa ila buhatan.

Ang demonetization subay sa Section 57 sa Republic Act 7653 kon ang New Central Bank Act.

Base sa ulahi’ng monitoring sa BSP aduna pa’y nahibilin nga 16 porsiyento kon 432 milyones kabuok nga kwarta nga nagtuyok sa nasud diin mokabat kini og P61 bilyones.

Sigun ni Sumbi nga wala’y mga establesemento sa Sugbo ang nangayo og lugway sa pagdawat sa karaang mga kwarta.

Sa nilabay nga adlaw nidagsa ang mga tawo sa nagkadaiyang banko diin sagad kanila nideposito sa ila’ng mga daan nga kwarta.

Samtang bisan og ang Disyembre 1 sa tuig 2015 ang katapusang adlaw sa paggamit sa karaang kwarta apan kadto’ng aduna pa’y mga gitagoan mahimo pa kini’ng pailisan karong tuiga sanglit kun moabot na ang tuig 2017, gawas nga dili na kini magamit kay wala na’y bili, dili na sab kini mahimo’ng pailisan.

Kahinumduman nga subsob ang gihimo’ng pagpahibawo sa BSP labot sa demonetization aron ang katawhan makaandam ug sayo nga makapailis sa ila’ng karaang kwarta. (BANAT NEWS)