PRO-7 may bag-ong director

CEBU, Philippines - Hingpit na nga nilingkod isip officer in-charge sa Police Regional Office-7 human sa turn-over ceremony kagahapon sa hapon sa hawanan sa Camp Sergio Osmeña Sr.

Si Chief Supt. Manuel Gaerlan mao’y nihulip kang Chief Supt. Prudencio “Tom” Bañas kinsa madestino isip Director for Integrated Police Office sa Northern Luzon. Sa giluwatan nga pakigpulong ni Gaerlan atubangan sa kapolisan sa PRO-7, kini nipadayag sa iya’ng kaandam sa pagserbisyo isip bag-ong labaw sa kapolisan sa rehiyon.

Gipasalig ni Gaerlan nga iya’ng ipadayon ang nasugdan nga mga programa ni Bañas ilabina sa kampanya batok sa drugas ug uban pa’ng ilegal.

Si Gaerlan nanawagan usab sa suporta sa kapolisan sa rehiyon sama   sa gihatag nga suporta sa iya’ng gihulipan nga opisyal.

Gipasalamatan usab ni Gaerlan si Bañas nga nakahimo sa daghang kalampusan ilabi na sa kampanya batok drugas diin kini nisaad usab nga iya’ng himuon ang tanan ilabi na sa mando ni PNP Director General Ricardo Marquez sa Oplan Lambat Sibat.

Una’ng marching order nga giluwatan ni Gaerlan mao ang pagpahugot sa kampanya sa drugas ug mando sa tanan nga mga polis nga dili moapil sa ilegal nga kalihukan ilabina sa pag-protektar sa mga druglords.

Gipasabot usab ni Gaerlan nga kadto’ng mga opisyal sa kapolisan nga nakahuman na sa duha ka tuig nga termino sa ila’ng nadestinuhan ang kinahanglan na usab nga hulipan sa dili pa maabot ang election ban karong Enero 10, 2016. (BANAT NEWS)