_banat
^

Shootout, 2 patay

(Banat) - December 9, 2015 - 9:00am

CEBU, Philippines - Dead on the spot ang duha ka mga armadong tawo ug upat nila ka mga kauban ang nadakpan human sa nahitabong binakbakay sa mga sakop sa kapulisan sa bukirang bahin sa lungsod sa Dumanjug nga naabot sa kasikbit nga barangay nga sakop na sa lungsod sa Ronda ug Argao pasado alas- 6 kagahapon sa buntag.

Wa magkaparehas ang pamahayag sa mga polis ug sa mga molupyo sa lugar kabahin sa eksaktong address diin nahitabo ang engkwentro sanglit  adunay miingon nga nahitabo kini diha sa Barangay Masa sa Dumanjug apan aduna say miingon nga sa Barangay Langin kini sa lungsod sa Ronda ug ingon man sa Barangay Apo sa lungsod Argao.

Ang mga namatay naila nga sila si Marciano Tiwan ug ang numero unong barangay kagawad sa maong barangay nga si Wilfredo Albios.

Samtang ang nadakpan mao sila si Bemar Mejares, alyas Jimboy nga giingong number one most wanted sa lungsod sa Argao.

Duna pa’y laing tulo ka mga babaye ang apil nga gidala sa kapulisan sa ilang buhatan aron ipaubos pa sa imbestigasyon aron mahibaw-an kung sila apil ba sa grupo sa mga armado.

Gitug-an ni Senior Inspector Arvi Arbuis, hepe sa Dumanjug Police nga nahinabi sa Banat News, ang mga suspetsado  suspek usab sa pagpang-ambush sa grupo ni Bise Mayor Efren Gica diha gihapon sa maong barangay niadtong Biyernes base sa pamahayag sa mga testigos.

Sumala pa ni Arbuis nga kagahapon sa alas-2 sa kaadlawon nakadawat sila og impormasyon  bahin  sa mga kaubanan sa mga namanhig nga nanago diha sa maong lugar hinungdan nga gilusad nila ang operasyon aron unta pagsikop kanila.

Sigun pa ni Arbuis nga apil sa ilang nadawat nga report nga armado ang suspetsado hinungdan nga wala sila nagkompiyansa ug nangayo sila og backup gikan sa Regional Public Safety Company (RPSB), Provincial Public Safety Company (PPSC) ug Special Weapons and Tactics (SWAT) team.

Banag-banag na dihang naabot ang kapulisan sa gipuy-an sa mga armado apan sa wala pa sila hingpit nakapaduol nakabantay ang mga suspek human mipaghot ang iro ug didto gikatahong gipabuthan sa mga armado ang mga polis hinungdan sa nahitabong pinusilay.

Human sa pinusilay nakit-ang patay sila si Albios ug Tiwan , samtang si Mejares ang nadakpan.

Nakuha sa kapulisan gikan ni Albios ang usa ka M79 Grenade Launcher nga duna’y napulo ka mga bala sa M203, M4 Assault Rifle usab ang nakuha gikan ni Tiwan samtang usa ka “KG9 submachine pistol” nga susama og dagway sa Ingram, ug usa ka shotgun ang nakuha kang Mejares.

Gawas sa pagpang- ambush sa grupo ni Gica, si Arbuis miingon nga si Mejares usa usab sa gitumbok nga mipusil patay sa duha ka mga polis sa lungsod sa Moalboal niadtong bulan sa Nobiyembre sa nakalabay nga tuig human mihimo ang kapulisan og anti-illegal drugs operation sa Barangay Tomonoy.

Gikompirma usab ni Arbuis nga ang mga suspetsado pulos kauban ni Nilo Quirante nga notado usab sa Dumanjug Police ug usa sa mga nakita nga mirapido sa grupo ni Gica.

Laing mikompirmar sa ilegal nga kalihokan sa grupo ang hepe sa kapulisan sa lungsod sa Argao, Sr. Insp. Alejandro Batobalonos kinsa miingon nga usa sa ilang gipangita si Mejares ug kini nalista isip “number one most wanted” sa kapulisan sa Argao. Si Batobalonos miingon nga si Mejares mao’y leader sa grupong “Jimboy Mejares Group,” grupo sa mga gun for hire nga nalambigit usab sa pagpayuhot og ilegal nga drugas sa lugar.

Gihulagway ni Batobalonos nga idlas si Mejares kay makatulo na ka higayon nila kining gironda apan pirmeng makasibat.

Gani gipadal-an pa og text message ni Mejares si Batobalonos sa nakalabay nga bulan nga nanghulga niini ug miingon nga pasakaon sa barangay Apo si Batobalonos kay  ila kining panitan.

“Gihulga pa ko anang tawhana, pasakaon daw sa Apo kay iya kong panitan. Daghan na gyud na og agi, bisan bayaran nimo na og P5 mil unya pakapinan og shabu mopatay na’na siya,” matud pa ni Batobalonos.

Daghang kaso sa pagpatay sa maong mga lungsod nga si Mejares ang gitumbok nga suspek apan  walay nilampos sa pagkiha kay pulos nangahadlok ang mga testigos.

“Kutob sa ma-estorya namo nga testigos siya ang itudlo kay dali ra man na siya mailhan kay naa’y tinigbasan sa liog, pero wala’y kaso ma-file kay mahadlok ang mga witness,” pasabot pa sa hepe sa Argao.

Plano ni Batobalonos nga iyang personal nga bisitahon sa prisohan sa Dumanjug ang suspek aron iyang makita human kini mibahad nga siya panitan.

Dugang pa sa opisyal nga magtabok-tabok lang sa Dumanjug ug Argao ang grupo ni Mejares  ug nanawagan siya karon sa mga nabiktima ni Mejares nga moduol lang sa Argao Police aron ilang matabangan sa pagpasaka og kaso.

Tungod sa nahitabong kagubot karon sa politika sa lungsod sa Dumanjug gumikan sa panagribal nila ni Mayor Nelson Garcia ug Bise Mayor Efren Gica, uyon si Gob. Hilario Davide III nga ipaubos sa Comelec watchlist ang maong lungsod.  (BANAT NEWS)

ACIRC ANG ARBUIS ARGAO BARANGAY BATOBALONOS DUMANJUG LUNGSOD MEJARES MGA NGA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with