CEBU, Philippines - Duha ka mga construction workers sa Vineyard Construction ang natagak gikan sa gitrabahong kisame sud sa Our Lady of the Sacred Heart Parish sa Capitol Site ning Dakbayan sa Sugbo kagahapon sa hapon. Ang natagak gikan sa gibanabanang 40 ka tiil nga gihabugon mao sila si Junjie Cañete ug Mark Gil Gerodia.
Atol sa pagbisita sa mga kadagkuan sa Department of Labor and Employment walay mga kadagkuan sa kompanya nga niatubang kay atoa tanan sa tambalanan diin gidala ang duha. Matud pa ni Rustico Levi Custorio, ang labor laws compliance officer sa DOLE, ilang ipatawag ang mga kadagkuan sa maong kompanya.
Susihon kung aduna silay Approved Construction Safety and Health Program ug sertipiko gikan sa The Philippine Contractors Accreditation Board.
Si Auxiliary Bishop Dennis Villarojo miingon giayo ang kisame sa simbahan. Matud niya ang duha gidala na sa Perpetual Succor Hospital ug stable na ang kahimtang ug andam silang motabang kanila.
Base sa impormasyong gihatag kaniya sa uyoan sa usa sa mga natagak mobalhin unta sa laing lugar ang mga trabahante ug gitangtang na ilang harness belt apan nahugno og kalit ang plywood nga gitungtongan sa scaffoldings.
Samtang didto sa Balamban, patay ang usa ka construction worker nga adunay giayo sa usa ka simbahan human kini nakuryentihan diha sa bunkhouse niini sa Sta. Cruz sa maong lungsod. Giila ang namatay mao si Dennis Cantutay, taga Sudlon 1, Cebu City. (BANAT NEWS)