CEBU, Philippines – Wa nay babag pa sa kandidatora ni Senador Grace Poe sa pagka-presidente sa nasud karong 2016 Elections human ang Senate Electoral Tribunal nibotar pabor kaniya.
Ang botasyon may kalambigitan sa disqualification case nga gipasaka batok sa senadora nga nagkuwestiyon sa iyang pagka-Pilipino nga nag-ingong siya usa ka Amerkano.
Ang SET nagbotasyon ug nigawas nga 5-4 pabor pagbasura sa disqualification case batok kang Poe.
Sumala pa sa report sa Philstar.Com, sila si Senador Pia Cayetano, Loren Legarda, Bam Aquino, Cynthia Villar ug Tito Sotto mibotar pabor ni Poe.
Samtang sila si Justice Antonio Carpio, Justice Teresita Leonardo-De Castro, Justice Arturo Brion ug Sen. Nancy Binay mibotar aron i-disqualify ang senador.
Kahinumdoman nga ang pildero nga senatorial bet nga si Rizalito David maoy mipasaka sa maong kaso batok kang Poe ug nagtinguha kining mataktak pagka-senador si Poe tungod kay matud pa way klaro kun taga asa siya ug kun Pilipino kini o dili.
Sa sayo pa, ang SET midesisyon nga di na apilon ang isyu kabahin sa residensiya ug tutukan na lang ang isyu bahin sa citizenship ni Poe.
Gawas sa SET, aduna pay laing giatubang nga daghang disqualification case si Poe diha sa Commission on Elections nga nagtinguhang pagwagtang sa bili sa iyang sertipiko de kandidatora sa pagka-presidente sa nasud. Gikan sa Philstar.Com (BANAT NEWS)