CEBU, Philippines - Nalangan na pag-ayo ang pagtukod og Children’s Crisis Center diha sa Sitio Sudlon, Barangay Lahug tungod lang sa usa ka pamilya nga nagpuyo sa maong yuta sa Kapitolyo nga wa pa g’yud mopahawa.
Ang mao nga pamilya gitanyagan na gani sa Kapitolyo og luna nga kabalhinan didto sa Minglanilla apan ang ilang gusto nga anha sila hatagan og relocation site sa Barangay Kalunasan.
Si Bise Gobernador Agnes Magpale mibutyag nga pila na ka buwan nga nalangan ang pagtukod sa Children’s crisis center tungod kay wala pa mohawa ang nahisgutang pamilya.
Giklaro ni Magpale nga ubos sa Urban Development and Housing Act (UDHA) duha lang ang ilang obligasyon sa probinsiya. Kini mao ang paghatag og tabang pinansiyal ug ang paghatag og dapit nga kabalhinan sa apektado nga pamilya.
Niadtong Martes ang maong pamilya giubanan na gani ni Provincial Engineer Hector Jamora ngadto sa Kalunasan apan ang maong pamilya nangayo na usab og desinyo sa balay nga ilang tukuron. (BANAT NEWS)