Pasangil vs CCMC gihimakak

CEBU, Philippines – Abogado sa Cebu City Medical Center mihimakak sa mga alegasyon nga gipasangil kanila.

Kini maoy giklaro ni Atty. Rey Chris Panugaling  bahin sa report nga nagyabo sila og mga fluids ug dunay pagpangawat nga nahitabo sa mga oxygen tanks diha sa CCMC.

Matud pa ni Panugaling, sukad niadtong tuig 2010 giusab na nila ang mga sistema sa hospital nga maghatag na og kasayon ug maayong serbisyo sa tanang mga pasyente nga modangop sa CCMC lakip usab ang pagpadagan sa tambalanan aron kini mas mapasayon.

Sumala pa ni Panugaling, gumikan sa ilang libre nga serbisyo nga gihatag sa katawhan, usahay magkuwang ilang stocks, apan gipangitaan na nila kini og solusyon.

"We believed that our human resource is competent enough to run this hospital, our professionals in the administration, medical and allied health sciences are equipped with the knowledge, attitude and skills in providing competent, compassionate medical care," pasalig pa ni Panugaling.

Gihulagway niya nga ang pag-atake kanila diha sa social media ug pipila ka mga radio stations usa ka "obsolete issues” kay kini kaniadto lamang nanghitabo.

Hinuon gitahod ni Panugaling ang opinyon sa katawhan kay duna may mga butang nga dili nila makita.

Giawhag ni Panugaling, tanan mga tawo nga dunay concern sa ilang tambalanan nga mopaabot niini direkta sa ilaha o kaha motawag sa linya sa ilang mga telepono o kaha mopadangat sa ilang mga social media accounts.

Sa pagkakaron adunay 255 ka mga indigent patients ang nakapahimulos sa “no balance billing” nga gipatuman sukad kini giimplimentar niadtong Hulyo. – /EIM) (BANAT NEWS)