14 ka bag-ong pari giordinahan

CEBU, Philippines – Gihangop ug gikalipay ni Archbishop Jose Palma ang ordinasyon sa 14 ka bag-ong pari kagahapon sa buntag sa Cebu Metropolitan Cathedral.

Nisaksi sa kalihukan sila si Archbishop Emeritus Ricardo Cardinal Vidal, Auxiliary Bishop Dennis Villarojo, daghang kaparian lakip na sa liboan ka layko ug pamilya sa bag-ong mga pari.

Matud ni Palma ang pag-ordina sa 14 ka bag-ong pari nagpakita og daku’ng gugma sa Diyos kinsa mao’y nagtawag ug mao’y nagpili. Mapasalamaton si Palma sa pamilya sa 14 ka bag-ong pari.

Ang pag-ordina sa mga bag-ong pari makatabang usab sa nagsingabot nga International Eucharistic Congress 2016 diin ang Sugbo mao’y host.

Atol sa Santos nga Misa gipahigayun ang rito sa pagpandong sa mga kamot sa nanambong ug pag-ampo sa mga bag-ong pari, pag-ilis sa bag-ong senina isip pari ug ang pagdihug sa lana sa ila’ng mga kamot.

Si Fr. John Temothy Jadulco sa iya’ng mensahe pasalamat human sa misa nagkanayun nga nahatagan na og katumanan ang ila’ng pangandoy.

Si Fr. Zenon Guanzon nipahigayun usab sa iya’ng una’ng misa human sa ordination sa lubnganan sa iya’ng mama sa Carreta Cemetery isip pasalamat tungod kay iya kini’ng gihimo nga inspiration.

Matud ni Rev. Father Arthur Manalo nga high school siya diha’ng iya’ng nabati nga gusto siya’ng magpari gumikan usab sa pari sa ila’ng parokya sa Boljoon nga nagsilbi niya’ng inspirasyon.

Si Rev. Father Rogen Leyson, 30 nga taga Guba, siyudad sa Sugbo, nihulagway nga dili gihapon siya makatuo nga pari na siya nga may mas bug-at nga responsibilidad nga sagubangon.        

Nanawagan ang bag-ong kaparian sa katawhan nga bisan og giordinahan na sila unta magpadayun ang mga pag-ampo alang kanila.

Ang bag-ong mga pari adunay ipahigayun nga Canta Misa sulod niini’ng buwana sa pipila ka bahin sa dakbayan ug probinsya sa Sugbo. – /GMR) (BANAT NEWS)