Roxas magpakuyog sa “daang matuwid”

CEBU, Philippines - Gipangulitawhan karon ni Interior Secretary Mar Roxas ang mga kahugpongan sa mga mag-uuma sa Sugbo nga suportahan siya karong gitahas kaniya ni Presidente Benigno Aquino III ang pagpadayon sa gitaak karon sa administrasyon nga “Daang Matuwid.”

Ang panawagan ni Roxas iyang gihimo atol sa gipahigayo’ng kalihukan alang sa kasaulogan sa Farmers’ Day kagahapon nga gihimo diha sa Capitol Social Hall diin siya maoy pinasidunggang dinapit.

Matud ni Roxas nga ang mga mag-uuma daku og natabang sa katilingban tungod kay kung dili tungod sa ilang pagkugi daghan ang magutom.

Gihulagway ni Roxas nga sa “daang matuwid” sa administrasyon karon, gihatagan og importansiya ang han-ay sa agrikultura ug padayunon pa sa administrasyon  ang paghatag  og dugang kaalam, mga ekipo ug training sa maong sektor aron molambo ang mga mag-uuma.

Matud niya giisip niyang sagrado ang tahas nga gipasa kaniya ni Aquino  ug obligasyon niya kini karon nga padayunon ang matinud-anon ug dunay sakripisyo nga pamunoan sa gobiyerno.

“Kaya hinihingi ko  po ang inyong tulong with all humility, hinihingi ko po ang inyong tulong na magpatuloy tayo, patuloy tayong sama-sama dito sa daang matuwid na ito dahil nakikita natin na malayo na ang narating natin at mas malayo pa ang mararating natin kung magsama-sama tayo sa daang matuwid,” ni Roxas pa.

Gihulagway ni Roxas nga ang labing unang kagawasan sa tawo mao ang kagawasan gikan sa pagkutoy sa tiyan, ug ang mga mag-uuma maoy “frontline” sa pagkombate sa kagutom.

Apan sumala pa ni Roxas di paigo nga magsalig lamang ang maong sektor sa panguma, kini maoy hinungdan nganong gihingusgan sa gobiyerno ang pagtukod og daghang mga eskuylahan alang sa mga anak sa mga mag-uuma.

Kini aron sila makat-on ug makabaton og taas nga edukasyon ug makatabang sa ilang mga ginikanan o  kaha sa ilang panguma gamit ang ilang mga nakat-onan. (BANAT NEWS)