CEBU, Philippines - Bisan pa man og mitaas ang kaso sa pagpangabuso sa mga kababayen-an dinhi sa dakbayan apan ang hepe sa Women’s and Children Protection Desk sa Cebu City Police Office miingon nga mas gamay ra gihapon ang mga kaso nga ilang napasaka sa korte. Kini tungod kay kadaghanan sa mga biktima ang dili na mopadayon sa pagpasaka og kaso batok sa ilang bana o kapuyo.
Sumala pa sa hepe sa WCPD, Inspector Arieza Otida nga nahinabi sa Banat News misaka og 60 porsiyento ang gidaghanon sa mga kaso sa pagpangabuso sa kababayen-an karong tuiga itandi sa unang kwarter sa nakalabay nga tuig.
Sumala pa ni Otida nga gikan sa bulan sa Enero hangtod Marso 2015, nakadawat sila og 281 ka mga kaso apan 40 lang niini ang napasaka sa korte samtang 89 ang nahusay gawas sa korte.
Sa nakalabay nga tuig, nakatala sila og 256 ka mga reklamo ug 25 ra niini ang napasaka sa korte samtang 88 ang nahusay gawas sa korte.
Matud pa ni Otida nga sagad sa mga kaso nga ilang nadawat naglambigit sa physical injuries nga binuhatan sa bana ug kapuyong lalaki.
Usa sa nakita nga hinungdan sa giawayan mao ang kabahin sa pinansyal ug ang kalinghod sa pangidaron nga nisulod sa kaminyuon o nakig-ipon.
“Daghang mga nagminyo nga mga bata pa kaayo, wala pa’y kalibutan sa ilang gihimo, mao nang ini’g maglisod na og kwarta kay wala’y mga trabaho sige na og away. Especially kung ma- pregnant na ang babaye ipugos na lang og minyo,” matud pa ni Otida.
Apan matud sa WCPD ang pagdaghan sa mga sumbong nga naabot kanila resulta kini sa gihingusgang kampanya batok sa pagpangabuso sa kababayen-an. (BANAT NEWS)