2 kolektor patay

CEBU, Philippines - Patay ang duha ka kolektor sa lending firm human nabanggaan ang motor nga ilang gisakyan sa multicab nga nag-deliver og isda pasado ala una kagahapon sa hapon sa barangay Pasil, lungsod sa Santander.

Ang namatay naila nga sila si Vincent Caloscosin, 26, taga Tubtubon, Sibulan ug si Elvis Gutano, 20, taga Cantupa, La Libertad, pulos sa Negros Oriental.

Samtang angol sab ang drayber sa multicab nga si Narciso Enoy, 52, taga Santa Catalina, Negros Oriental.

Si PO3 Leonixto Solon, imbestigador sa Santander Police Station, niingon nga ang multicab gikan sa Negros ug padulong mag-deliver og isda sa dakbayan sa Sugbo. Samtang ang mga kolektor nagdali sab nga maka-uli sa Negros agi sa Liloan, Santander.

Dihang naabot na sa barangay Pasil, ang multicab milihay sa libaong sa karsada ug nikawat sa pikas nga lane sa dalan. Wala na makalihay ang motor ug nabangga kini sa atubangan nga bahin sa multicab nga miresulta sa kamatayon ni Coscosin.

Si Gutano gidala pa unta sa Oslob District Hospital apan pasado alas 4:00 kagahapon namatay sulod sa tambalanan. Ang driver sa multicab didto na gidala sa tambalanan sa Dumaguete City nga mas duol gikan sa Santander kompara sa dakbayan sa Sugbo. (BANAT NEWS)