P1.2M shabu nasakmit
CEBU, Philippines - Mokabat sa kapin usa ka milyon ka pesos nga shabu ang nasakmit sa kapulisan gikan sa usa ka gidudahang tigpayuhot og ilegal nga drugas atol sa usa ka buy-bust operation diha sa Sitio Highway, Barangay Pung-ol Sibugay ning dakbayan sa Sugbo niadtong nakalabay nga hapon.
Nasikop sa mga sakop sa City Anti-Illegal Drugs Special Operations Task Force si Danilo Arcilla, 42, alyas Boy diha sa iyang panimalay.
Matud pa ni Senior Inspector Eunil Avergonzado, ang hepe sa CAIDSOTF nga nahinabi sa Banat News tulo ka semana nga gipanid-an si Arcilla human dunay misumbong bahin sa iyang operasyon. Sumala pa ni Avergonzado nga si Arcilla mismo ang mitunol sa usa ka putos nga shabu ngadto sa poseur buyer gamit ang usa ka libo ka pesos nga buy-bust money.
Si Arcilla gihulagway nga usa ka level 2 drug pusher kay makabaligya kini og kapin 200 gramos matag semana.
Nakuha sa kapulisan ang usa ka medium size, upat ka dagko nga putos nga mokantidad og P1.2 milyon, ang buy-bust money ug P2,710 nga gituohang halin sa shabu. (BANAT NEWS)
- Latest
