30 balay naugdaw
CEBU, Philippines - Gibana-banang 30 ka panimalay ang naugdaw sa nahitabong sunog kagahapon sa hapon sa Sitio Dawis, Barangay Tabunok, Dakbayan sa Talisay.
Ang maong sunog giisa ngadto sa Task Force Alpha ug ang tanang firetrucks sa dakbayan ang miresponde.
Ang hepe sa Talisay City Fire Department nga si Senior Inspector Randy Mendaros mibutyag nga kini nakontrolar nila sud sa 15- minutos apan nagbilin og danyos nga mokabat sa P150,000.
Matud pa ni Mendaros nga base sa ilang nakuha nga impormasyon nagsugod ang maong sunog sa panimalay sa usa ka Bebie Ambayik. Ang iyang anak nga si Edgar ra ang nahabilin sa maong panimalay.
Butyag ni Mendaros nga aduna'y usa ka lalake ang nakaangkon og first degree burn human natagakan og debris gikan sa atop.
Sagad sa mga panimalay hinimo sa light materials samtang ang uban mixed-materials ug uban usab niini mga shanty houses hinungdan nga dali kaayong mikatap.
Gisusi pa sa mga arson investigators kung unsay hinungdan sa maong sunog apan "initial findings" mao ang faulty electrical wiring.(Gary Lao/EIM)(BANAT NEWS)
- Latest
