Pusher sa Mactan nasikop

CEBU, Philippines - Nasakmit sa kapolisan ang 36 ka pakete sa shabu ug usa ka medium pack sa sitio Soong, barangay Mactan, dakbayan sa Lapu-Lapu alas 10:30 sa gabii niadtong Miyerkules.

Matud ni Police Senior Inspector Verniño Noserale, hepe sa Mactan Police Station 2, nga ilang nasikop pinaagi sa buy-bust operation si Masanori Dungog Sushi, 27-anyos ug may kapuyo sa sitio Sea Breeze, sa gihisgutang barangay.

Narekober sa kapolisan ang duha ka tag P100 nga marked money atol sa transaksiyon sa police poseur buyer ug ni Sushi. Gawas sa ginadiling drugas, nasakmit usab ang drug paraphernalia sa suspek lakip na ang P800 nga halin.

Dugang ni Noserale nga sa wala pa nahitabo ang operasyon, usa ka surveillance ang gibuhat sa kapolisan nga milanat sa duha ka semana. (BANAT NEWS)