CEBU, Philippines - Grabe’ng naangol ang duha ka babaye nga napunggit sa usa ka pribado’ng sakyanan sa ilang paglabang didto sa dalan M.C. Briones, Barangay Subangdaku, dakbayan sa Mandaue kaniadto’ng Sabado sa kaadlawon.
Ang mga naangol mao sila si Myrene Espina, 28, taga Barangay Duljo-Fatima, dakbayan sa Sugbo ug Sherlyn Flores, 28, nga taga Barangay Bacayan. Nadam-agan sila sa Hyundai Starex pick-up nga gimaneho ni Jobart Go Villarin, 32, nga taga Poblacion, Compostela.
Si SPO3 Eduardo Flores nga maoy investigator sa traffic division sa Mandaue City Police Office (MCPO) miingon nga milabang sa karsada ang mga biktima dihang kalit kining nadam-agan sa sakyanan ni Villarin.
Ang duha ka biktima dali nga gihatod sa Chong Hua Hospital sa dakbayan sa Sugbo ug ang drayber nga nakadasmag mitahan usab dayon ngadto sa kapolisan ug gitanggong karon sulod sa prisohan. (BANAT NEWS)