CEBU, Philippines - Patay na nga nakaplagan ang usa ka abubhoan nga bana nga naghikog sa dakong punoan sa kahoy’ng pagatpat didto sa Barangay Sambag, dakbayan sa Bogo kaniadto’ng Biyernes sa gabii. Si PO2 Leonedes Pedrano sa Bogo City Police Station miila sa namatay nga si Edwin Pedroza, 37, minyo ug usa ka traysikol drayber nga nagpuyo sa Flores Compound sa mao nga barangay.
Matud ni PO2 Pedrano nga hubog nga nahiuli sa ilang panimalay si Pedroza ug nagyawyaw sa iyang asawa tungod sa katahap nga may gikalambigit kini nga laing lalaki. Ang asawa nasuko tungod sa pagyawyaw sa iyang bana nga namasangil ngadto kaniya nga nakiglambigit og laing lalaki nga maoy hinungdan sa mainiton nila’ng panaglalis.
Dugang ni PO2 Pedrano nga gibadlong sila sa ilang mga anak ug maoy hinungdan nga migawas kini sa ilang panimalay ug nagbilin og mga pulong nga maghikog. Si PO2 Pedrano miingon nga human sa pagpamulong niini ngadto sa iyang sakop sa pamilya si Pedroza mikuha og pisi nga nylon ug milakaw paingon sa pagatpatan daplin sa baybayon.
Ang mga anak ug asawa nga nakadungog nga nagbahad kini nga maghikog daw wala na lang nila panumbalinga sanglit makadaghan na man kini mohimo og bahad nga maghikog apan wala gayud buhata. Paglabay sa pipila ka gutlo daw gibati na og kabalaka ang mga anak ni Pedroza maoy hinungdan nga kuyog sa ilang mga ig-agaw ilang giapas sa labong nga pagatpatan apan tungod sa kangitngit wala nila kini makita. Nagpatabang na sila sa ilang mga silingan nga adunay flashlight nga maoy ilang giiwag hangtud nga ila kining nakaplagan nga nagbitay sa dakong punoan sa pagatpat nga walay panimuot.
Ang nagtinga nga si Pedroza dali nga gihatod sa Danao Provincial Hospital apan gideklarar kini sa mga doktor nga patay na. (BANAT NEWS)