CEBU, Philippines - Gipahibalo ni Land Transportation Franchising and Regulatory Board (LTFRB) -7 Regional Director Ahmed Cuizon nga dili na kinahanglang molukat og special permits kadtong mga pasaheroang bus nga molabyog og biyahe sa laing rota.
Kini tungod kay gi-extend sa LTFRB ang Bus Rationalization kutob sa Nobiyembre 30.
Matud pang Cuizon sa pakighinabi sa Banat Manobela kagahapon, sugod niadtong bulan sa Hunyo kutob Oktubre 17 ning tuiga lamang unta gitakda ang Bus Rationalization.
Apan tungod sa nagsingabot nga All Saints Day ug All Souls Day sa Nobiyembre 1 ug 2 gi-extend kini.
"Since gi-extend man, dili na kinahanglang molungkat pa og special permit," matud pa niya base sa nadawat nila kagahapon nga Memorandum Circular.
Apan duna gihapoy mga agents sa Land Transportation Office ug LTFRB nga maghimo og random inspections aron tan-awon ang ilang mga prangkisa ug dokumento. (BANAT NEWS)