CEBU, Philippines - Trese ka residente sa Sitio Phantom, Barangay Lorega-San Miguel sa siyudad sa Sugbo ang mipasaka og kasong sibil batok ni Mayor Michael Rama ug Prevention, Restoration, Order, Beautification and Enhancement (Probe) Chief Raquel Arce. Silang Margarita Arnoza, Lourdes San Felipe, Victorio Fernandez, Grace Marie Cabucos, Dolores Gaviola, Estarlita Mailig, Joan Coyoca Bacus, Lee Bacus, Rafel Vailoces, Julian Vailoces, Josephine Mendoza, Rabaira Recla, ug Vivica Arnoza Carin mipasaka sa kaso ubos sa Cebu City Regional Trial Court Branch 10. Matud sa mga residente, wala maapil ang ilang mga panimalay sa sunog niadtong Marso 18 ning tuiga apan giapil sila sa pagdemolis ug sa re-blocking. Sumala pa sa ilang reklamo, adunay offer gikan sa city government nga hatagan sila og P10,000 ug dose ka square-meters nga espasyo aron makatukod og balik sa ilang panimalay.
Apan matud nila dili kini paigo sa ilang napundar na sa dugay nga panahon. Miapelar ang mga residente nga ipadeklara ang demolisyon nga “illegal, null, and void,” ug angay nga ipatukod og balik ang ilang mga panimalay nga gi-demolish. Gusto ‘sab sa mga residente nga mobayad ang siyudad sa pagguba sa ilang mga panimalay nikabat sa P200,000 ; moral and exemplary damages nga P50, 000, ug lawyer’s fees nga P50, 000.
Gihatagan sa korte og kinse ka adlaw ang mga gikiha sa pagtubag sa maong complaint. (BANAT NEWS)