CEBU, Philippines - Magpadayun ang demolisyon sa kabalayan sa Mahiga Creek sa sitio Mahusay, Subangdaku, dakbayan sa Mandaue hangtud wala’y kamandoan ang korte sa pagpahunong.
Kini ang gipadayag ni City Legal Officer Jiovanni Tianero nunot sa plano sa apektadong mga residente nga modangop sa korte aron pagpangayo og temporary restraining order (TRO).
Matud ni Tianero nga hangtud nga wala’y TRO padayon ang demolisyon nga ilang nasugdan lakip na sa kapin sa 100 ka panimalay sa kasikbit nga sitio Mahayag.
Dugang ni Tianero nga niadto pa untang Hunyo nila ipatuman ang pag-demolis sa mga panimalay apan tungod sa hangyo sa mga molupyo nga sila na lang ang boluntaryong moguba hinungdan nga ilang gihatagan og lugway ang pagpahawan sa maong lugar.
Iyang gitataw nga plano sa kagamhanan ang paghawan gyud sa Mahiga Creek sanglit usa man kini ang hinungdan sa pagbaha sa lugar.
Matud ni Tianero nga ilang gipaabot ang hingpit nga paghawan sa sitio Mahayag nga maoy unang gidemolis niadtong miaging adlaw ug human niini ilang isunod ang pagkoral sa maong lugar aron dili kabalikan og tukod og mga balay.
Samtang nasayran nga ang kagamhanan sa siyudad sa Sugbo nakig-alayon sa siyudad sa Mandaue labot sa planong pagguba sa mga footbridge sa Mahiga Creek.
Si Mandaue City Administrator, Atty. James Abadia, nagkanayon nga ang pagguba sa mga footbridges tipik lang sa solusyon nga ilang himuon aron masulbad ang problema sa baha. (BANAT NEWS)