Maagian sa drainage project ipang-expropriate

CEBU, Philippines - Gipang-expropriate sa kagamhanan sa dakbayan sa Mandaue ang mga pribadong luna nga maigo sa pagpang-ayo sa mga kanal.

Si City Administrator, Atty. James Abadia, miingon nga mao kini karon ang ilang gihimo sa Little Boracay sa barangay Cabancalan nga nahunong ang pagtrabaho sa kanal.

Ang City Legal Office ang gitahasan sa paghimo sa maong lakang isip bugtong paagi nga mapadayon ang proyekto nga pag-ugmad og kanal sa maong lugar.

Si Assistant Mandaue City Engineer Andres Suson nga nahinabi sa Banat News miingon nga ang pagdumili sa mga tag-iya sa luna nga maigo sa pagtadlas sa kanal maoy nasinati nilang suliran.

Gitataw ni Suson nga kasamtangan karong gipaningkamotan sa kagamhanan ang pagsulbad sa nasinati mga pagbaha sa panahon nga kusog ang pagbunok sa uwan pinaagi sa pagpalapad ug pagpalawom sa mga kanal sa kabarangayan.

Matud niya nga ang Department of Public Works and Highways (DPWH)-7 ang niugmad sa ubang susamang proyekto sama sa kanal sa dalan A. S. Fortuna sa Banilad.

Niadtong Miyerkules sa gabii nasinati ang pag-awas sa tubig sa Mahiga Creek sa Subangdaku ug Butuanon River sa Maguikay, Guizo, eskina sa mga dalan Albaño ug M. Logarta sa may North Bus Terminal,  dalan M.C. Briones ug barangay Tipolo ug A.S. Fortuna nga hinungdan sa kalangan sa biyahe sa mga sakyanan. (/GMR)(BANAT NEWS)

 

Show comments