CEBU, Philippines - Patay ang usa ka habal-habal drayber human kini gipusil sa lalaking nagmotorsiklo sa Sitio Cantabo, Barangay Gunting, Barili kagahapon sa buntag.
Ang biktima naila nga si Jemar Alegado, 34, taga Balao, Barili. Samtang gitumbok nga mibuhat sa krimen ang duha ka mga lalaki nga nagsakay ‘sab og usa ka motorsiklo.
Matud pa ni PO3 Jorve Timagos sa Barili Police Station nga nahinabi sa Banat News, nga gikan sa barangay Maghanoy ang biktima ug paingon na kini sa barangay Balao aron maghatod og pasahero.
Wala makabantay ang biktima nga gisundan kini sa gunman ug pag-abot sa Sitio Cantabo gisikitan kini gikan sa likod ug gipusil kini sa bukton hinungdan nga natumba.
Nakadagan pa si Alegado apan giusban pagpusil ug naigo sa likod ug dihang natumba diha na kini gitiwasan sa ulo sa gunman ug kini daling misibat sa maong lugar.
Dali pa unta nga gidala sa Barili District Hospital ang biktima, apan nakabsan gayod kini sa iyang kinabuhi. Giingong tuyo ra gyud sa killer ang biktima kay wa man maigo ang pasahero niini, gituohan nga kaaway niini ang mamumuno. (BANAT NEWS)