CEBU, Philippines- Gipatin-aw sa Department of Environment and Natural Resources-7 nga duna’y pagtugot gikan sa ilang labaw’ng buhatan ang pag-pamutol sa acacia sa dakbayan sa Naga.
Matud sa tigpamaba sa DENR-7, Eddie Llamedo, nga nasayud ang central office labot sa pagpamutol sanglit mihatag kini og special tree cutting permit.
Kasamtangang gihunong ang pagpamutol sa mga depektosong mga kahoy human nimando si DENR Sec. Ramon Paje nga i-recall ang permit.
Giklaro sa DENR-7 nga ang mga kahoy nga ilang gipamutol dili na madala og tree surgery ug nakahatag og risgo sa katawhan.
Nunot sa pagbabag sa mga environmentalists, si Llamedo miingon nga bukas sila alang sa usa ka third party assessment.
Andam usab nilang atubangon ang kaso nga posibleng ipasaka sa mga environmentalists. -/GMR) (BANAT NEWS)