CEBU, Philippines - Gikasuhan og pagpangawat ang duha ka kaswal nga mga kawani sa munisipyo sa lungsod sa San Remigio human gipasanginlang milungkab sa buhatan sa Bureau of Internal Revenue niadtong Huwebes.
Gidakop sa follow-up operation sa kapolisan sila si Jasper Dosdos, taga barangay Argawanon ug Jeslab Anonuevo, taga barangay Poblacion niadtong Biyernes sa buntag sa munisipyo.
Si Dosdos ug Anonuevo, na-assign isip utilities sa Waste Management Office ug sa motorpool, gipasanginlang mikawat sa P6,700 cash sa buhatan sa BIR.
Matud ni Chief Insp. Alexander Ancao, hepe sa San Remigio Police Station nga nakasulod sa munisipyo ang duha pinaagi sa pagguba sa plywood nga gitapak sa butanganan sa aircon sa opisina sa Traffic Management Office.
Didto giingong miagi ang duha ug gipanangtang ang tulo ka bildo sa jalousie sa buhatan sa BIR aron sila makasulod ug gikuha ang kwarta sa cabinet.
Tungod sa daghang pagduda, daling gipatawag ang duha sa kapolisan ug giangkon niini ang krimen.
“Giuli tuod nila ang jalousie blades pero wala natarung…didto ra man pud sila niagi sa ilang gi-agian,” matud ni Ancao.
Ang duha gipriso sa San Remigio Police Station. (BANAT NEWS)