CEBU, Philippines - Nasikop sa City Intelligence Branch (CIB) sa Cebu City Police Office ang gidudahang level 1 drug pusher atol sa buy-bust operation sa miaging gabi diha sa Sitio Baho, Barangay Calamba, Cebu City.
Ang nadakpan giila nga si Romelito Flores, alyas “Metong”, 39, ug nagpuyo sa maong lugar. Gitug-an ni Superintendent Romeo Santander sa Banat News nga idlas kaayo si Flores kay daghan kini’g sakop nga magbantay sa gawas sa iyang panimalay. Sumala pa ni Santander nga tulo ka adlaw ang ilang gihimong pag-surveillance sa nahimutangan ni Flores hangtud nga dunay police asset silang nakapalit g’yud og daku nga putos sa drugas.
Wala na nakalihok pa ang suspek human napalibotan dayon sa mga polis ang iyang balay. Nakuha gikan kaniya ang duha ka medium size, tulo ka dagkong pakete ug 123 ka gagmay nga pakete nga pulos may sulod nga drugas nga nagkantidad og kapin sa P100 mil.
Nakuha sab sa kapulisan ang kapin P19 mil nga cash nga gituhoan nga halin sa ilegal nga negosyo ni Flores ug usa ka digital nga timbangan sa drugas. - /EIM) (BANAT NEWS)