CEBU, Philippines - Menos ang nagpa-validate sa ilang voter’s registration sa buhatan sa Commission on Elections sa dakbayan sa Toledo sukad niadtong Mayo 6.
Matud ni Toledo City Election Officer, Atty. Michael Angelo Sarno, nga naproblema sila gumikan kay adunay 19 mil ka tawo ang ilang gilauman nga magpa-validate apan wala pa kini makaabot sa katunga.
Hinoon hangtud pa sa Oktobre 31, 2015 ang pagpang-validate ug pagpangrehistro sa mga botante.
Gipasabot ni Sarno nga importante kaayo nga makapa-validate ang mga botante aron makuhaan og hulagway ug biometric data aron dili mapapas sa listahan sa Comelec.
Gawas niini, dili usab makabotar sa eleksiyon sa 2016 ang dili makapa-validate ug dili makaparehistro.
Nanawagan si Sarno sa mga taga Toledo nga mobisita sa ilang buhatan aron samtang sayo pa dili maabtan sa deadline diin maghuot na usab ang magparehistro. (/GMR)(BANAT NEWS)