Isda magnihit sa ting-init

CEBU, Philippines - Gipahibalo sa Bureau of Fisheries and Aquatic Resources (BFAR)-7 nga daku ang kahigayonan nga magnihit ang isda sa pag-igo sa El Niño dinhi sa Central Visayas karong buwana.

Matud ni BFAR-7 regional director Andres Bojos nga tungod sa kainit sa panahon ang mga isda mobalhin ngadto sa ilawom nga bahin sa dagat.

Si Bojos miingon nga ang mga gagmay’ng mananagat maapektohan kay menos na man ang makuha niining isda.

Dugang ni Bojos nga dunay ubang isda nga kun init g’yud kaayo ang tubig adto na sila sa lawod.

Si Bojos nipahibawo nga ilang i-monitor ang kahimtang sa mga mananagat sa lalawigan sa Sugbo ug ubang lugar sa Visayas subay sa pagnihit unya sa makuha niining isda.

Gipahibawo hinuon niini nga ang ilang buhatan andam nga mohatag og ayuda alang sa lainlaing kahugpungan sa mga mangingisda nga maapektohan unya sa dili normal nga kainit tungod sa El Niño.

Gilauman nga mosaka usab unya ang presyo diha sa mga isda sa kamerkadohan kung monihit na kini. (BANAT NEWS)