Karambola sa sakyanan 1 patay

CEBU, Philippines - Patay ang 38- anyos nga traysikol drayber ug kritikal ang kahimtang sa 3-anyos nga batang babaye ug ang iyang inahan human gidasmagan ang ilang gisakyan sa nagsunod nga 10-wheeler truck ug nabanda pa ang traysikol sa sugat nga Isuzu forwarder diha sa national highway sa barangay Tunghaan sa lungsod sa Minglanilla kagahapon sa alas-12:00 sa udto.

Ang patay paghiabot sa tambalanan mao si Paldin Castilliano,38, lumad nga taga Calatrava, Negros Oriental apan kasamtangang nagpuyo sa Sityo Dakay barangay Tulay lungsod sa Minglanilla.

Samtang ang kritikal ang kahimtang sa 3-anyos nga batang babaye nga si Lieane Villanisa ug naangol sab ang iyang inahan nga si Girlie Villanisa, taga barangay Inayagan siyudad sa Naga.

Ang drayber sa 10-wheeler truck mao si Alejandro Romaguera, 40, minyo ug molupyo sa lungsod sa Boljoon. Samtang ang ikatulo nga sakyanan nga nalambigit sa hitabo mao ang Isuzu forwarder nga gimaneho ni Marlon Mabilin, 36.

Matud ni PO2 Nikki Carlo Plarisan sa Minglanilla Police Station dihang nahinabi sa Banat News, ang traysikol nga gisakyan sa mga biktima paingon sa siyudad sa Sugbo ug nagsunod ang 10- wheeler truck.

Giingong kusog kaayo ang dagan sa maong trak uggidumbol ang traysikol ug tungod sa kakusog sa impact nalabay ang traysikol ug nilupad ang drayber paingon sa ibabaw nga bahin ug pagtugpa nag- una ang ulo nga natibugsok sa sementado nga karsada.

Nalabay usab gawas sa traysikol ang manag-inahang Villanisa ug didto mitugpa sa karsada.

Didto mitugpa sa atubangan sa Isuzu forwarder gikan sa siyudad sa Sugbu ang nalabay nga traysikol hinuon swerte kay wala na kini sakay.

Ang mga biktima gipanghatud sa Minglanilla District Hospital apan gideklarar nga dead on arrivalsi Castilliano ug kritikal ang bata ug ang inahan.

Ang drayber sa 10- wheeler truck ug Isuzu forwarder gitanggong na karun sa karsel sa Minglanilla Police ug gipaabot nga pasakaan og kaso. (BANAT NEWS)