CEBU, Philippines - Mokabat sa P15 milyones nga kantidad sa mga sakyanan, ligid ug lubricants ang gisakmit sa Bureau of Customs Port of Cebu diin personal nga giablihan ni BOC Commissioner Ruzzano Rufino "Ruffy" Biazon sa CIP kagahapon sa hapon.
Lima ka 40 footer container vans ang giablihan nga adunay sud nga 2 units right hand drive nga ambulance gikan sa Japan ug gipanag-iya sa Golden Harvester International, speed boat gikan sa Australia nga gipanag-iya ni Lester Hitbourne, unom ka motorsiklo, tulo ka Mitsubishi Colt, usa ka Mazda Elf, usa ka payloader, 463 used tires, ukay-ukay ug 80 barrels nga hydraulic oil nga iya sa ARFG Trading and Cargo Facilities.
Ang maong mga kargamento giingong nakalapas sa Sec. 2530 sa Executive Order 156 human kini giingong mis-declared ug ang uban walay manifesto nga miabot kini dinhi sa Sugbu.
Gumikan niini ang kapolisan sa Port of Cebu pinangulohan ni Maj. Camilo Casculan Jr. misakmit sa maong mga vans.
Gisugat ang kasaulogan sa ika-127th nga anibersaryo sa Customs Cebu kagahapon og kalampusan ni Customs Port of Cebu District Collector Edward dela Cuesta. (BANAT NEWS)