CEBU, Philippines - Gihagit ni Cebu Archbishop Jose Palma ang tanang mga bag-o ug karaang mga nakadaog sa nakalabay nga eleksyon nga unahon ang serbisyo ug ipadaplin ang pamolitika aron mapalambo ang nasud.
Si Palma, kinsa maoy presidente sa Catholic Bishops Conference of the Philippines (CBCP), mibutyag sa iyang statement gikan sa CBCP News nga ang mga public officials gibutang sa pwesto aron moserbisyo sa katawhan ug dili sa ilang kaugalingong interes.
Matud ni Palma nga dili paigo ang pagpasalamat lang sa mga tawo nga nibotar kanila sa pwesto kondili buhaton nila ang ilang gipanaad.
Matud ni Palma nga angayan nga magpakita sa iyang tiunay nga legasiya ang matag opisyal ngadto sa katawhan.
Sumala pa ni Palma nga ang mga public officials angayang magseryoso sa pagtabang sa mga tawo tungod kay mao kini ilang sagradong responsibilidad subay sa ilang mandato.
Niadtong Domingo, pormal nga ni-asumer ang tanang newly-elected local ug national officials sa nasud.
Nanawagan usab si Palma sa tanang bag-o ug karaan nga mga miyembro sa Lower House nga dili magpunay og absent. (/EIM) (BANAT NEWS)