CEBU, Philippines - Gihugopan sa pagsugat ang imahen ni San Pedro Calungsod sa mga katoliko sa dakbayan sa Mandaue sa paghidangat niini kagahapon sa hapon sa National Shrine of Saint Joseph sa barangay Centro alang sa ikatulong Triduum Mass.
Si Monsenyor Adelito Abella nga maoy kura paruko sa maong simbahan maoy nangulo sa kaparian sa pagsugat sa imahen uban sa mga opisyal sa kagamhanan sa maong dakbayan nga gipangulohan ni Mayor Jonas Cortes, bise mayor, mga konsehal ug mga barangay opisyal.
Sa iyang homily ni Monsenyor Abella iyang gihagit ang kabataan nga himuong panag-ingnan ang kinabuhi ni San Pedro Calungsod nga misakripisyo sa iyang kinabuhi sa ngalan sa iyang pagtuo.
Tibuok gabii nga gibilaran sa mga tawo ang imahen ug karong adlawa usa ka farewell mass ang himuon una pa kini dad-on sa Ouano Wharf sa barangay Looc alang sa fluvial procession padulong sa South Road Properties. (BANAT NEWS)