Dagongdong, pagdaloy ng lava patuloy sa Bulkang Mayon
MANILA, Philippines — Patuloy ang paglikha ng dagondong sa Bulkang Mayon sa Bicol habang may nagaganap na pagdaloy ng lava sa bulkan sa nakalipas na 24 oras, ayon sa record ng Philippine Institute of Volcanology and Seismology (Phivolcs).
Ayon sa Phivolcs, ang pagbuga ng lava ay naitala sa may Basud, Bonga at Mi-isi gullies kasabay ng naitalang 180 volcanic earthquakes kabilang ang 13 volcanic tremors na may isa hanggang 25 minuto ang haba.
Nagtala rin ang bulkan ng 185 rockfall events at 18 pyroclastic density current signals o uson at pagluwa ng nasa 3,748 tonelada ng asupre at pagsingaw na nasa 1,800 metrong taas mula sa bunganga ng bulkan na napadpad sa timog-timog-silangan at pamamaga ng bulkan na may panandaliang pag-impis sa hilagang-silangan.
Dulot nito, patuloy na ipinagbabawal ng Phivolcs ang pagpasok ng sinuman sa loob ng anim na kilometrong (6 km) radius Permanent Danger Zone at paglipad ng anumang aircgraft sa itoktok ng bulkan dahil sa banta ng pagguho ng bato, pagtilapon ng mga tipak ng lava o bato, pag-agos ng lava, uson, katamtamang pagputok at agos ng lahar kung may matinding pag-ulan doon.
Ang Bulkang Mayon ay nasa ilalim ng alert level 3 o ibig sabihin ang bulkan ay may mataas na aktibidad na nagbabadya ng malakas na pagputok.
- Latest
