Ara’s Hazel Berry

CEBU, Philippines - “The Gift” sa TV5 ang gikatakdang proyekto unta ni Ara Mina nga ipasalida karong buwana. Sanglit, giusab sa nahisgutang estasyon ang ilang lineup sa primetime, aron mapasalida ang PBA finals, Enero sunod tuig na mugawas ang maong serye, nga bituonan ni Ogie Alcasid. Childhood sweetheart sa character ni Ogie ang role ni Ara sa The Gift. Hinuon, padayon ang ilang taping busa sige gihapon ang iyang trabaho.

Apan dili ang showbiz maoy dako og pahat sa panahon karon sa four-time best actress nga si Ara kundili ang iyang nagakakusog na nga pastry business nga iyang ginganlan og “Hazel Berry.” Hazel ang tinuod ngalan ni Ara, samtang ang berry ang sagad isagol sa mga pies ug cakes. Wala pa siya’y tindahan, apan sa Instagram nagkadaghan ang  iyang orders kada adlaw, diin miabot na kini sa Amerika. Choco chip ug oatmeal cookies, ingon man cupcakes ang mga bestseller ni Ara karong panahona. Apan dili madali-dali ang pag-order og cupcakes ni Ara kun sa gawas sa Metro Manila kini dad-on, gumikan kay kinahanglan nga hand-carry aron dili madaot. Gani sa ilang pag-anha sa Sugbo niadtong Biyernes sa milabay nga semana, dinhi na sa Sugbo gidekorasyonan ni Ara ang gi-order nga cupcakes.

Daan na gyud matud pa ganahan og baking si Ara. Niadtong dili pa siya artista, kanunay na siya nga maghimo og brownies ug macaroons. Dihang nakahigayon siya, mitungha siya sa International School for Culinary Arts and Hotel Management (ISCAHM) og baking class, diin iyang gisiguro ang Pastry Baking. Sa sinugdanan wala siya’y plano nga mamaligya gumikan kay ganahan lang gyud siya mag-bake. Pero dihang may nakatilaw sa iyang Red Velvet cupcakes atol sa bunyag sa iyang pag-umangkon, daghan ang giganahan ug buot mu-order na niya. Hinungdan nga iya na lang nga gibaligyaan, hangtud nga nagkadaghan na ang orders. Siya gyud mismo ang mangunay pag-bake. May mga gipatudluan na hinuon siya nga trabahante niya sanglit dili na matud pa niya ma-ato paghimo tanan.

Kauban ang pipila usab ka nga online business suppliers, nagpahigayon sila si Ara ug mga kaubanan og duha ka adlaw nga “bazaar” sa Gaisano Country Mall (October 11-12) diin gihugupan og maayo ang ilang mga dala nga cookies ug fashion accessories. Tayming kaayo nga nagsaulog ang Country Mall sa iyang ika-20 ka tuig nga kasumaran sa pagkatukod hinungdan nga nag-show usab si Ara sa maong mall pagka Sabado sa gabii. Gihugupan siya og maayo, kasagaran nalingaw kaayo niya. Ang uban mikanta pa dungan niya sa iyang hit single kaniadto nga, “Ay Ay Pag-ibig.”

Kauban ni Ara sa iyang pagtekang dinhi sa Sugbo ang iyang hinigugma nga si Bulacan, Bulacan Mayor Patrick Meneses, kinsa buot lamang nga magpabilin sa likod sa camera ug dili apilon pag-interview. Gani atol sa show ni Ara, wala kini mipahimutang sa lugar para sa mga kaubanan sa iyang uyab, kundili nagtindog lamang siya sa kilid nga bahin sa entablado. Dili matud pa siya mag-showbiz, kay pampolitika ra siya, sanglit naggikan siya sa pamilya sa mga politiko sa Bulacan. Hinuon atol sa panahon sa wala pa ang show, nakighinabi si Meneses sa pipila ka mga sakop sa E-Group (Cebu Entertainment Group). Iyang gibutyag nga anaa na siya sa ikaduhang termino niya isip mayor sa Bulacan ug kun ugaling magpapili siya og mas taas nga posisyon, dili matud pa national post. Gobernador ang iyang gusto sanglit buot niya nga sa Bulacan muserbisyo.

Managsama sila ni Ara nga busy, apan makasingit pa gayud sila og oras para mag-bonding. Gawas pa , matud ni Meneses, dili maabtan og usa ka oras ang byahe gikan sa Bulacan paingon sa Quezon City, diin anaa siya magbase. Bonding time nilang duruha ang yoga ug malling diin mutan-aw sila og sine usahay. Sanglit duha na ka tuig ang ilang relasyon, nahisgutan na matud pa nila ang kasal pero wala pa gyuy petsa kanus-a. Murag gusto ni Meneses nga sunod tuig, apan dihang giingnan nga dimalas ang numero kwatro sa feng shui, hayan sa 2015 na matud pa sila magminyo. “Actually, gustong-gusto siya ng mommy ko. Sabi ni mommy, “wag mo nang pakawalan, alagaan mong mabuti” nagkanayon si Ara kabahin kang Meneses. Nahimamat na pud matud pa ni Ara ang pamilya ni Meneses—inahan niini ug igsuong babaye lamang. Wala nay amahan ang mayor.

Wala pa matud pay pelikula si Ara karon sanglit, kasagaran sa mga nadawat niya nga offers nahimo na niya. Buot niya nga bag-o na pud ang iyang himuon. Kun siya’y pabut-on, gusto niya nga istorya kabahin sa tawo nga adunay split personality….Ryan Mark 

Concert for Bohol

Adunay gi-organisa si Cesar Montano ang mini-concert nga ipahigayon karong October 25 sa Teatrino isip fundraising project alang sa mga nabiktima sa linog didto  sa Bohol. Nanawagan ang aktor sa mga kaubanan niya sa industriya nga musuporta sa maong proyekto.

Martin motabang pud

Nakahukom si Martin Nievera nga iyang ihatag sa mga biktima sa linog ang tipik sa kita sa umaabot niya nga 30th  anniversary concert sa Smart Araneta Coliseum karong November 22. Nagkanayon ang singer nga makapalipay kaniya ang pagtabang sa iyang isigkatawo.

Lauren mobisita ni Megan

Nagplano si Lauren Young nga kung duna siya’y bakante nga oras, mobisita siya sa iyang igsuon nga si Miss World 2013 Megan Young didto sa London. Dugay na nga gipangandoy ni Lauren nga makatikang sa maong dapit.

Hangyo ni Oyo

Gibutyag ni Oyo Sotto nga suportahan niya ang mga umaabot nga projects sa iyang asawa nga si Kristine Hermosa . Gihangyo lang niya kang Kristine nga balibaran ang kissing scenes.”Para wala na lang ding problema, wala na lang ding kissing scenes. Mamaya magalit na naman sa akin ‘yung mga fans nila,” suma pa ni Oyo ngadto sa ABS-CBN News.

Echo-Kristine tandem banhawon

Gidungog nga nagplano karon ang ABS-CBN nga banhawon ang tandem nila ni Kristine Hermosa ug Jericho Rosales sa telebisyon kinsa nag-uban niadto sa malampuson kaayong seryeng Pangako Sa ‘Yo.   

Angel misakay sa MRT

Nagpadayon gihapon ang problema sa dagan sa trapiko didto sa kaulohan ilabi na kung mobunok ang uwan ug mao kini ang hinungdan nga magbaha usab ang mga tawo nga mosakay sa MRT aron dili malangan sa ilang mga lakaw ug usa na niini ang aktres nga si Angel Locsin.

Usa si Angel sa nag-antos sa taas nga linya adtong Miyerkules sa gabii sa MRT partikular na sa Ayala Station.

Gi-post sa aktres sa Instagram ang hulagway niya samtang padung siya mosulod sa MRT ug duna kini caption nga ,” Puwede na palang mag premiere night sa ayala station! Haha! #haggardoversoza.”

Ang hashtag nga #haggardoversoza managsama sa termino nga ‘ngarag’ nga  gitawag usab isip ‘haggard.’

Nakaangkon dayon kini og 2500 likes gikan sa iyang followers ug nagbaha usab ang comments niini sulod lang sa usa ka oras.

Kahinumduman nga ubay-ubay na nga mga artista ang nakasakay na sa mga pampublikong sakyanan gumikan kay nagdali sa ilang mga lakaw, kini sama nila ni Kris Aquino , Manny Pacquiao, Anne Curtis, Enchong Dee, Julia Montes, Piolo Pascual ug Angelica Panganiban.

Amy gipadungog-dungog busa misibat sa TV5

Mitingog na si Amy Perez human sa pipila ka semana nga pagpakahilom kalabot sa pagbiya niya sa TV5.

Kahinumduman nga nikatap ang istorya niadto nga matud pa dunay nahitabong panagbangi tali nila ni Amy ug sa production staff sa programang Face To Face.

“Just to be clear sa mga nangyari, never kong sinabi sa management na magtanggal ng tao sa Face To Face,” tsika pa ni Amy ngado sa PEP.ph.

Suma pa ni Amy nga dunay higayon nga gusto sa production staff nga mag-taping og four episodes sa usa ka adlaw ug niangal siya niini gumikan kay bag-ohay lang siya nanganak niadtong higayona ug una niya nga higayon nga gipaubos siya sa caesarean section.

Human sa maong hitabo,  nabantayan na lang ni Amy nga dunay nagpadungog-dungog kaniya sa Facebook ug ni-resign na lang siya sa maong programa gumikan kay wala na siya kaagwanta niini.

“Kaya nag-resign na lang ako kasi di ko na kaya ang ganung betrayal,” dugang pa sa TV host.

Nasagmuyo si Amy gumikan kay siya na hinuon ang nahimong kontrabida  sa mata sa iyang mga kaubanan.

“Mas pinili ko ang peace of mind kesa kumita ako.Kasi, lahat naman sila may work pa now, kaya I’m happy for all of them..Ako na lang ang iiwas,” nagkanayon si Amy.

Nagkanayon ang TV host nga mas pilion pa niya nga mahimong komportable  ang iyang kaugalingon kumpara sa kuwarta.

“At the end of the day, alam mo yung pag di ka na masaya, talagang mas pipiliin mo ang peace of mind kesa financial gain.Kaya ako na lang umiwas para na rin happy lahat,” dugang pa niya.

Giklaro hinuon ni Amy nga nananghid gyud siya og tarong sa pagbiya niya sa Kapatid Network ug mapasalamaton siya gumikan kay nakasabot ra sa iyang habig  ang TV5 executives. Samtang gihimakak  sa TV host ang report nga matud pa molugwa siya sa morning show sa ABS-CBN  nga  Umagang Kay Ganda nga kaatbang sa kanhi show niya sa TV5 nga Good Morning Club.

Gidungog karon nga malantawan puhon si Amy sa pagbanhaw sa programang The Singing Bee sa ABS-CBN kung diin makauban niya si Roderick Paulate.

Mag-partner sa negosyo

Managsama ang mga bida sa Be Careful With My Heart nga sila si Jodi Sta. Maria ug Richard Yap nga dunay mga negosyo. Nagplano karon ang duha nga mag-partner puhon sa lain na pud nila nga negosyo.

Geoff mi-slim na

Gipasigarbo ni Geoff Eigenmann ang bag-ong pamorma sa iyang lawas ug niresulta gyud ang todo niya nga pag-diet. Nius-os og 35 pounds ang iyang timbang. Kahinumduman nga gipadalhan siya og “fat memo” sa GMA-7 niadto gumikan sa iyang katambok.

Lovi mitikang sa Hawaii

Nilarga na kagahapon si Lovi Poe paingon sa Honolulu, Hawaii. Motambong si Lovi sa Hawaii International Film Festival kung diin misalmot ang indie film niya nga Sana Dati. Mobalik si Lovi sa nasud karong October 21

Charee giintriga

Gihimakak ni Charee Pineda ang taho nga matud pa sexy ang mga sapot nga iyang isuot sa session sa mga konsehal sa Valenzuela City. Nagkanayon ang aktres nga kahibalo siya molugar sa iyang kaugalingon ug formal gyud nga sapot ang sul-ubon niya sa session.

Special guest ni Sarah

Gipaabot nga mosamot kahugyaw ang 10th anniversary concert ni Sarah Geronimo karong November 15, sa Araneta Coliseum gumikan kay special guest sa pop princess ang Fil-Am nga si Jason Farol. Nasayran naka-duet ni Jason niadto si Kelly Clarkson sa TV show nga Duets.

Jan pasok sa Bubble Gang

Ang kanhi Starstruck finalist nga si Jan Manual maoy bag-ong Kapuso artist nga gidugang sa Bubble Gang. Nasuwayan na ang pagka-komedyante ni Jan gumikan kay taud-taud na kini nga nahimong segment host sa StarTalk.

Lloydie nangandam na

Gibutyag ni John Lloyd Cruz nga iyaha na nga gikondisyon ang iyang kaugalingon aron mahimo siya nga epektibo nga komedyante. Gipangandaman pag-ayo ni Lloydie ang umaabot nga sitcom nila ni Toni Gonzaga sa ABS-CBN.

Sam: Wala ko mahasol!

Giklaro ni Sam Milby nga wala siya nahasol sa posibilidad nga mahimong babag si Jake Cuenca sa pagdiskarte niya kang Jessy Mendiola. Suma pa ni Sam nga dili malikayan nga ma-link si Jessy ngadto ni Jake gumikan kay magkauban man kini sa seryeng Maria Mercedes. Nitumaw ang mga obserbasyon nga dunay dakong tsansa si Sam nga mabihag ang kasing-kasing ni Jessy gumikan kay silang duha ang kasagaran mag-uban sa pagpanuroy.

Kris komportable sa drama

Tsika pa ni Kris Bernal nga mas lisod buhaton ang “comedy scene” kumpara sa “drama scene”. Nagkanayon si Kris nga dili lalim ang pagbato og komedya atubangan sa kamera gumikan kay gikinahanglan gyud nga magkatawa niini ang mga viewers.

Vice nagsagol ang feelings

Nagsagol ang gibati sa TV host nga si Vice Ganda human nahimutang ang iyang pangalan sa ika-37 nga puwesto sa 200 top taxpayers. Suma pa ni Vice nga nalipay siya gumikan kay dakong garbo alang kaniya nga mituman gyud siya sa iyang obligasyon sa gobyerno, apan sa susamang higayon,naguol usab siya gumikan sa mga balita nga matud pa dunay ubang opisyales sa nasud ang nagpahimulos og maayo sa kuwarta sa katawhan. Ang pork barrel scam maoy usa sa init nga isyu karong panahona.