UP Legends gikoronahang back-to-back champions

CEBU, Philippines — Ang UP Legends milampos pagdepensa sa ilang korona apan nag-agi usa sila og overtime sa wala pa bughaa ang Tatay Rudy's, 70-67, sa makutas ug kulbahinam nga final sa UP Alumni Basketball League Season 7 sa UP Gym sa Barangay Lahug, siyudad sa Sugbo ning bag-ohay pa lamang.

Napapha ang 22 puntos nga labaw sa UP Legends, 51-29, human sa tulo ka kuwarter gumikan kay ang Tatay Rudy's milusad og nagkayong 31-9 nga resbak aron pagpuwersa og 60-60 nga panagtabla human sa regulasyon.

Apan ang UP Legends mipakita og igong katakos sa dugang singko minutos sa aksiyon aron pag-eskapo ngadto sa tres puntos nga kadaogan.

Si Ricardo de la Rosa maoy nangu sa upat ka UP Legends nga mikadlit og double figures uban ang 13 puntos, siyam ka rebounds, duha ka assists ug upat ka steals aron siya mamahimong Finals Most Valuable Player.

Midugang si Lyndon Gaspar og 12 puntos, siyam ka rebounds ug usa ka assist, samtang si  season MVP Junie Alejandro miamot og 11 puntos,  unom ka rebounds, unom ka assists ug usa ka block. Si Jan Sahilan mitali sab og 11 puntos uban ang tulo ka rebounds, usa ka assist ug tulo ka steals alang sa UP Legends, nga usa na lang ka titulo ang gintang gikan sa makasaysayanong three-peat.

Uban ni Boodee Monteño isip team captain, ang ubang mga miembro sa UP Legends back-to-back champions mao sila si Chyle Del Rosario, Jon Carlito Ramos, John Michael Wong, Jodl Job Dabon, Alexis Acedillo, Henry Castro, Axel Torreta, Jason Pangilinan, Macky Saldua, ug Randy Donaire.

Si Xamuel Plaza mipabuto og 25 puntos uban ang duha ka rebounds ug duha ka assists apan wala mosaler ang impresibo niyang salida alang sa Tatay Rudy's. Si Gil Cabrera mikolekta og 11 puntos, pito ka rebounds, upat ka assists ug upat ka steals sa pildirong kawsa.

Sa sangka alang sa ikatulong dapit. si Giovani Taok mihipos og 13 puntos, walo ka rebounds, tulo ka assists ug duha ka blocks aron ibandera ang Team Dosmil ngadto sa 60-46 nga paglampaso sa Lethals.