DSWD nakapagawas na og P582.95 milyon alang sa social pension

CEBU, Philippines — Ang Department of Social Welfare and Development sa Central Visayas (DSWD-7) mipagawas og P582.95 milyon nga social pension alang sa 194,317 ka kabos nga senior citizens sa Central Visayas isip ikaduhang kwarter nga benepisyo alang sa 2026.

Ang pagpanghatag ubos sa Social Pension Program for Indigent Senior Citizens (SocPen) gihimo pinaagi sa mga local government units (LGUs), samtang ang DSWD-7 maoy midugang sa pondo aron masiguro nga nadawat sa mga benepisyaryo ang ilang ayudad.

Sa kinatibuk-ang gidaghanon sa mga benepisyaryo, 91,981 gikan sa Bohol, samtang 102,336 gikan sa lalawigan sa Cebu, lakip ang mga highly urbanized cities sa Cebu, Mandaue ug Lapu-Lapu.

Matud sa DSWD-7, adunay dugang mga benepisyaryo nga naapil sa programa tali sa una ug ikaduhang kwarter sa 2026 human sa pagpatuman sa gi-update nga proseso sa pagpili sa mga benepisyaryo base sa Community-Based Monitoring System (CBMS) sa Philippine Statistics Authority (PSA).

Aron masiguro ang katukma sa mga rekord sa mga benepisyaryo, nagtinabangay ang mga kawani sa Philippine Statistics Authority Region 7 ug DSWD-7 sa pag-validate sa mga senior citizen kansang mga rekord adunay mga kalainan o sayop, pinaagi sa pag-usab sa pagsusi sa ilang impormasyon sa wala pa ipagawas ang ayuda.

Gisagop usab sa departamento ang Philippine Identification System (PhilSys) National ID isip nag-unang kinahanglanon nga identification card atol sa pagpanghatag sa social pension ug giawhag ang mga benepisyaryo nga wala pa marehistro nga kumpletuhon ang ilang digital ID enrollment. Gidugang sa DSWD-7 nga ang pagpanghatag gihimo ubos sa ilang Harmonized Actions and Processes for Swift, Accountable Yield (HAPSAY) nga inisyatiba, nga nagtumong sa paghimo sa proseso sa distribusyon nga mas organisado, episyente ug mas angay alang sa mga senior citizen. — /MEL (BANAT NEWS)