Mibawos na's Bongbong

Sa labing una nga higayon, gisaway ni Presidente Bongbong Marcos si kanhi Presidente Rodrigo Duterte. Wa gyud kuno mohimo’g lakang pagsumpo sa grabeng pangurakot sa binilyon ka pesos nga flood control projects atol sa iyang termino.

Matud ni Bongbong nga ang kampanya batok sa mga responsable sa anomalosong flood control projects gihimo ra sa iyang administrasyon human sa iyang State of the Nation Address (SONA) sa miaging tuig.

Miingon si Marcos nga kaniadtong 2018, dihang si Duterte pa ang presidente, gibulgar na ni kanhi House Majority Leader Rolando Andaya Jr. ang giingon niyang P300-billion flood control anomaly.

Si Andaya miingon nga usa ka mayor sa Bicol mitug-an nga dunay kanhi miyembro sa gabinete ni Duterte nga mi-resign kay milansar sa eleksiyon, nagpapundo og P300 million alang sa flood mitigation project sa iyang lungsod, apan wa ra kini susiha.

Matud ni Marcos nga karon ang iyang administrasyon maoy gipasanginlan nga unta ang anomaliya nagsugod man sa administrasyon ni Duterte.

Miingon si Marcos nga kon wa pa niya kini hisgoti sa SONA ang anomaliya sa flood control project, mahimong dili ra kini mabulgar ug magpadayon ang pangurakot sa kuwarta sa gobiyerno.

Gipanghimakak ni Marcos nga gipili ra ang iyang mga kaatbang sa politika nga giimbestigar sa pagkalambigit sa anomaliya.

Si Marcos mibulgar sa anomalosong flood control project human niya maadto ang dapit sa Bulacan nga giingong dunay nahuman na nga flood control project, apan wa diay proyekto nga gihimo.

Kaniadtong September 2025, gimugna ni Marcos ang Independent Commission for Infrastructure (ICI) nga miimbestigar sa mga anomalosong flood control projects, ug daghang nasakpan niini, apil ang ghost flood control project sa Davao Occidental nga nakapapriso ni Sara Discaya. Gipapiyansa ra ba si Discaya sa korte.

Matud ni Marcos nga ang ICI nakapasaka og kaso batok sa 65 ka individual nga nalambigit sa anomalosong flood control projects, apil niini ang mga engineers sa DPWH.

Ang 6,700 ka bank accounts sa maong mga tawo gi-freeze sa Anti-Money Laundering Council pinaagi usab sa mando sa Court of Appeals. Ang nalambigit nga kantidad miabot og P24.7 billion.

Husto baya sab si Marcos kay gani napapriso na sa iyang kagamhanan ang giingong mga nalambigit sa anomaliya nga naglakip ni Senador Jinggoy Estrada, ug kanhi senador Ramon “Bong” Revilla Jr., apil na si kanhi DPWH Secretary Manuel Bonoan ug daghan pa nga mga opisyal sa DPWH.