Excise tax sa LPG, Gas gisuspenso

CEBU, Philippines — Gipahibalo ni Presidente Ferdinand Marcos Jr. kagahapon, Lunes, Abril 13 ang suspensiyon sa excise tax sa liquefied petroleum gas (LPG) ug kerosene. Sa press briefing sa Malacañang,  si Marcos nagkanayon nga nadesisyonan sa gobiyerno nga tangtangon ang buhis sa mga produktong petrolyo nga kada adlaw gigamit sa tanang mga Pilipino.

"Tinanggal ko na ang excise tax sa LPG at sa kerosene," matud pang Marcos.

Tungod ani, mamenusan og P3.36 kada kilo ang LPG, o P37 kada tanke matud pa sa presidente. Samtang sa kerosene, ang suspensiyon sa excise tax nagtangtang og  P5.56 kada litro. Samtang gitun-an na sab karon sa Palasyo ang panawagan sa mga transport groups nga suspensuhon ang buhis sa krudo ug gasolina.

Matud pa ni Marcos nagdiskusyon sila karon sa Kabinete karong adlawa, Martes. Sa pikas bahin, gipagamyan sab ang tariff o taripa sa mga produktong pagkaon ug agrikultura aron mapagaan ang kalisod sa mga konsumidor ug masiguro ang proteksyon sa mga lokal nga mag-uuma. Kun mahinumdoman, nisaka ang presyo sa lana tungod sa pag-atake sa US ug Israel sa Iran nga niresulta sa paspas nga pagsaka og 4.1 percent sa inflation sa bulan sa Marso nga lapas sa target sa economic managers sa nasud.

Ang inflation mao ang bili sa P1 nga niabot nalang og P.75 sentimos. Ang lana sa Pilipinas halos tanan gikan sa Middle East mao nga nitriple ang pagsaka sa presyo niini pagsugod sa giyera.

Ning bag-o, gipahibalo ni US President Donald Trump nga mopatuman kini og naval blockade sa tanang barko sa Iran ug sa ilang mga pantalan diha sa Strait of Hormuz human napakyas ang ilang negosasyon didto sa Pakistan niadtong Sabado.

Wala hinuoy labot sa ilang did-an nga makaagi ang mga barko sa ubang mga nasud. — IBM