Baligyaana’g surplus gi-monitor

CEBU, Philippines — Mga tindahan nga namaligya og mga piyesa o parte sa mga motor susihon sa kapolisan tungod sa nasakpang ilegal nga pagpamaligya og mga parte sa motor nga walay mga dokumento.

Nagkanayon si Police Lieutenant Colonel Wildemar Tiu, Regional Chief sa Regional Highway Patrol Unit(RHPU)-7 mohimo sila og monitoring labot sa mga tindahan nga namaligya og mga surplus.

Kini human gironda nila ang usa ka tindahan sa dakbayan sa Talisay nga namaligya matud pa motorcycles engine ug engine block nga wala'y saktong dokumento.

Gipahimangnoan niini ang mga negosyante nga dili basta modawat og mga baligya nga spare parts nga wala'y dokumento tungod kay posibleng ang gibaligya kanila gikan kini sa mga kinawat nga mga motor.

Mipasidaan si Tiu nga kun sa ilang posesyon kini nasakpan, sila maoy mapasakaan og kaso.

Dunay mga parte sa mga motorsiklo ug makina nga dili mahimong basta-basta lang ilisan sama anang tambutso, engine blocks diin nakakulit ang serial number sa makina ug ingon man mga chassis niini kay naa sab diha ang serial number niini.

Atol sa gihimong operasyon sa RHPU-7 ug CIDG-7 nakompiskar sa kapulisan ang 12 ka motorcycle engine ug engine blocks ang nasakmit sa maong tindahan ug gidakop ang ginang nga namaligya niini.

Ang dinakpan gipasakaan na og kasong kalapasan sa section 6 sa Republic Act 10883 ug Section 6 sa P.D. 1612 kun Anti Fencing Law. IBM BANAT NEWS