Pundo sa LDF gamiton alang sa rehabilitasyon sa siyudad

CEBU, Philippines — Igahin sa Kagamhanan sa Dakbayan sa Sugbo ang P1.5 bilyon gikan sa wala magamit nga Local Development Funds (LDF) sa 2016 hangtod 2022 aron mapaspasan ang rehabilitasyon human sa gibiling kadaot sa Bagyong Tino.

Gipahibalo ni Cebu City Mayor Nestor D. Archival atubangan sa Cebu City Development Council (CCDC), representante sa Deparment of Public Works and Highways ug mga barangay kapitan nga makabenepisyo ang 80 ka barangay sa siyudad sa dakong kantidad.

Matag barangay makadawat og P700 milyones para sa imprastraktura ug community development projects, sama sa drainage systems, pag-ayo sa mga access roads, ug uban pang pasilidad nga magamit sa mga lumulupyo sa siyudad.

Samtang si acting vice mayor Winston Pepito mitahu usab nga posibleng mahimong relocate site ang usa ka three-hectare property diha sa Barangay San Jose.

Aron nga adunay relocation site ang mga apektadong pamilya sa kalamidad ug sa mga residente nga nagpuyo sa peligroso nga mga dapit sama sa sapa ug dagat, gigahinan sab kini og P300 milyones aron nga makapalit og luna.

Gimanduan ni Archival ang mga kapitan sa barangay nga mangita og luna nga mamahimong mapalit sa kagamhanan aron nga maproseso kini sa dili madugay.

Sa pagkakaron, nisugyot si acting vice Mayor Pepito nga adunay tulo ka ektarya nga luna sa Barangay San Jose nga mamahimong relocation site.

Matud pa ni Archival nga gikinahanglan nga mapadali ang rehabilitasyon aron nga makabalhin ang mga pamilya nga nagpasilong sa mga tunghaan sa siyudad.

Sa laing bahin, gigahinan ang Cebu City Medical Center og P500 milyones aron nga makumpleto na ang tambalanan.

Lakip sab sa gahinan og pundo mao ang pagpalit og heavy equipment nga ibutang sa amihanan ug habagatang distrito aron mas paspas ang disaster response sa umaabot nga mga kalamidad. — /MEL (BANAT NEWS)