Baricuatro mitubag sa pasangil

MANILA, Philippines —  Mitingog na si Gobernador Pamela Baricuatro bahin sa mga pasangil nga wala ang presensiya sa Probinsya sa Sugbu atol sa pag-igo sa 6.9 magnitude nga linog sa northern Cebu.

Sa iyang Facebook post kagahapon, Oktubre 11, si Baricuatro midepensa sa Cebu Provincial Government gikan sa maong pasangil kay matud pa niya naabot dayun siya sa northern Cebu pipila palang ka oras human sa maong linog.

Walay pagtabontabon, gisaysay sa gobernador kun unsa ra ang iyang nahimo kauban sa mga opisyal sa Kapitolyo  nianang maong mga orasa sa ilang pag-abot sugod alas-11 sa gabii (usa ka oras human sa pagtay-og sa linog) niadtong Septembre 30 sa gabii hangtod pagkasunod adlaw sa ilang pagbiyahe padung sa amihanan.

Matud ni Baricuatro, dali niya nga gitigom ang Emergency Response Team uban sa tanang department heads sa kapitolyo aron dunay koordinasyon alang sa dinaliang pagtubag sa mga panginahanglan sa mga apektadong residente.

Apil sa iyang gihimo ang pag-coordinate sa Provincial Disaster Risk Reduction and Management Office (PDRRMO) ug mikontak sa mga national government agencies lakip na sa Office of the President aron masiguro nga makadawat dayon og dinaliang hinabang ang mga konstituwente sa norte.

Gisaysay usab sa gobernador nga adto niya gibutang sa Philippine National Police (PNP) Command Center alang sa inisyal nga briefing aron ma align ang seguridad ug rescue operations.

Pinaagi sa tabang sa Department of Health, nagpadala dayon og unang team sa mga doktor alas-2 palang sa kadlawon  ngado sa northern Cebu aron motabang sa pag-atiman sa mga naangol lakip na ang ubang mga pasyente.

Pagka-alas 3 sa kadlawon, mitambong si Baricuatro sa tigom uban sa Office of the Civil Defense ug sa Department of Public Works And Highways (DPWH) aron ma-coordinate ang relief ug rescue efforts.

Pagka-alas 6 sa buntag, nagpahigayon og aerial assessment ang gobernador sa mga lungsod ug didto siya mitugpa sa dakbayan sa Bogo diin iyang nakita ang daghang nakalas nga kinabuhi, ug dakong epekto ug kadaot sa linog.

Samtang didto sa maong dakbayan, matud ni Baricuatro, uban sa iyang anak ug Capitol consultant nga si Dr. Nikki Catalan, nag-coordinate sila alang sa pagbalhin sa mga pasyente ug sa mga naangol ngadto sa duol nga mga hospitals; nagtawag og mga ambulansya para sa mga kinahanglan ibalhin nga pasyente; mitawag og punerarya alang pag-atiman sa mga patay nga lawas ug kanunay nga mikontak sa PDRRMO aron ma-update sa mga rescue operations sa mga biktima nga natabunan sa mga nangahugno nga estruktura.

Nibalik dayon ang gobernador sa kapitolyo alang sa pag organisar sa relief operations alang sa mga residente nga apektado.

"To those asking, 'Where was the provincial government?' -- God knows, we were there -- in trenches, in the air, in the command centers, and in the hospitals -- leading, coordinating, and mobilizing every resources at our disposal to save lives and restore hope," matud ni Baricuatro.

Si Baricuatro mitubag niini human nga niadtong Lunes, atol sa regular session sa provincial board, si ABC President ug ex-officio board member Celestino "Tining" Martinez nangita sa Cebu Provincial Government human sa linog ug ang matud pa kakulang sa koordinasyon pag-abot sa relief operations ngadto sa mga LGUs sa norte  partikular na sa dakbayan sa Bogo.

Si Baricuatro nagkanayon nga taliwala sa kahadlok, kalibog ug heartbreak sa nahitabo sa norte, mibarog siya ug maoy nangulo sa aksyon, ug compassion aron matabangan pagluwas ang mga residente nga apektado sa kalamidad.

Sumala sa gobernador nga taliwala sa "political scrutiny" ug walay basehan nga akusasyon, matag aksyon nga himoon sa kapitolyo ubos sa iyang liderato, gihimo nga adunay "urgency, transparency" ug tinguha nga mapanalipdan ang mga Sugboanon ug makabangon.

"We will not be deterred by politics, unfounded accusations and political demolition job. We will remain accountable, transparent, and relentlessly focused on saving lives and rebuilding our communities. God knows our intentions and our efforts, and we will keep moving forward—together," matud sa gobernador. Iyang gipasalamatan ang tanang ahensya sa gobyerno nga mitabang sa ilang operasyon ug miawag sa mga Sugboanon nga mag-amping ug maminaw sa mga official advisories.

"If you can help-- whether by donating blood, offering resources, or volunteering -- your support is needed," awhag sa gobernador. (BANAT NEWS)