CEBU, Philippines — Duha patay sa nahitabong disgrasya sa kadalanan diha sa Barangay Uling, Dakbayan sa Naga kagahapon sa buntag.
Ang mga namatay mao ang truck boy sa delivery truck ug drayber sa motorsiklo nga naigo sa delivery truck.
Ang truck boy naipit kini ug nakaangkon og grabeng kadaot sa lawas ang drayber sa motorsiklo.
Sa oras sa pagsuwat niining balita wala pa makuha ang mga pangalan sa biktima.
Ang mga sakyanan nga nalambigit sa disgrasya mao ang sports utility vehicle (SUV), pasaherong bus, truck nga nag-deliver og manok ug duha ka motorsiklo.
Base sa report sa Naga City Police Station nga ang delivery truck nawad-an og preno samtang nagbiyahe sa Cebu City bound lane diha sa Naga-Uling Road.
Ang maong truck unang niigo ngadto sa SUV dayon ngadto sa Toyota Jitney nga nag-parking daplin sa highway ug niigo ngadto sa duha ka motorsiklo ug nibangga sa pasaheroang bus.
Gawas sa mga nakalas sa maong hitabo adunay mga naangol nga daling gidala ngadto sa tambalanan. (BANAT NEWS)